Փաստ ինֆո

Ներկայումս շատ ինտենսիվ աշխատանքներ են կատարվում Կիրանցի նորակառույց դպրոցում, որպեսզի հասցնեն սեպտեմբերի 1-ին բացել այն։

«Համոզված ենք, որ Փաշինյանը սեպտեմբերի մեկին Կիրանցում է լինելու, դե, գիտեք, նկարվելու տեղ է, որպեսզի նորակառույց շենքի բացման արարողությանը մասնակցի, քարոզչություն անեն, իբր, տոնական մթնոլորտ ցուցադրեն», - «Փաստինֆո» -ի հետ զրույցում ասաց Կիրանց գյուղի բնակիչ Անդրանիկ Նազարյանը։

Ինչ վերաբերում է իրական տրամադրություններին, ապա, մեր զրուցակցի տեղեկություններով, բնակիչներից մի մասն իր երեխաներին տեղափոխել է հարևան գյուղերի դպրոց, իսկ թե քանի՞ ծնող կտանի երեխային այդ շենք, պարզ կլինի սեպտեմբերին։

Ինչպես արդեն հայտնել ենք՝ Կիրանցի նոր դպրոցը, Փաշինյանի կառավարության նախաձեռնած ապօրինի սահմանազատման արդյունքում, դարձել է սահմանակից թշնամուն ու գտնվում է ընդամենը 40 մետր հեռավորության վրա։ Փաշինյանի կառավարությունը կարծում է, թե դպրոցի մոտ կառուցված պատը բավարար է ադրբեջանցու նշանառության տակ գտնվող դպրոցում երեխաների անվտանգությունը պաշտպանելու համար։

Այսօր Նիկոլ Փաշինյանի ասել է, թե Կիրանցի բնակիչներին անվտանգության աստիճանը չբավարարելու դեպքում նոր դպրոց կկառուցեն։ Որքանով են դա կիրանցեցիները հավանական համարում «Փաստինֆո»-ի հարցին ի պատասխան՝ Նազարյանն ասաց, որ նման խոստում Փաշինյանից անձամբ է լսել ամիսներ առաջ, երբ Կիրանցի բնակիչները բողոքի ցույցեր էին անում։
«Բայց ե՞րբ է Փաշինյանը որևէ խոստում կատարել, որ»,- ասաց Ա. Նազարյանն ՝ ավելացնելով, որ, անկախ իրենց բողոքներից, ամեն ինչ ավարտել են ու իրենք վաղուց փաստի առաջ կանգնած են։

Նորակառույց դպրոցը, Անդրանիկ Նազարյանի գնահատմամբ, որպես շենք որակյալ է, հին շենքը վթարային է, բայց այն ընդամենը 40-50 մ հեռավորության վրա է սահմանից։ Իսկ ադրբեջանցիները, Նազարյանի խոսքերով, բավական լավ են զգում Կիրանցի բնակիչների նախկին տարածքներում , տեղավորվել են, ինտենսիվ աշխատանքներ են կատարում սահմանի՝ իրենց անցած կողմում։

Աղբյուր` Փաստինֆո