Փաստ ինֆո

Սուրճի չափավոր օգտագործումը կարող է դրական ազդեցություն ունենալ ուղեղի առողջության վրա, ասել է բժիշկ-նյարդաբան Վլադիմիր Մարտինովը: Այդ օրգանի վրա հայտնի ըմպելիքի ազդեցության մասին նա հայտնել է ՌԻԱ Նովոստիի հետ զրույցում։

Սուրճի դրական ազդեցությունը նա անվանել է կարճաժամկետ հիշողության բարելավումը եւ կենտրոնացման ու ուշադրության բարձրացումը, քանի որ կոֆեինը խթանում է կենտրոնական նյարդային համակարգը: Մարտինովը հավելել է, որ կոֆեինը նաեւ օգնում է բարելավել տրամադրությունը, քանի որ մարդու օրգանիզմում բարձրանում է դոֆամինի եւ սերոտոնինի մակարդակը, ինչը նաեւ նվազեցնում է դեպրեսիայի վտանգը: Սուրճը, շարունակել է բժիշկը, հակաօքսիդանտներ է պարունակում, որոնք նույնպես դրական են ազդում ուղեղի վրա, պաշտպանում են այն ոչնչացումից:

Բժիշկը նաեւ նշել է առողջության համար օգտակար սուրճի քանակը։ Օրական նա խորհուրդ է տվել օգտագործել առավելագույնը 300-400 միլիգրամ կոֆեին՝ մոտավորապես 3-4 բաժակ սուրճ՝ յուրաքանչյուրը 200 միլիլիտր: Ընդ որում, ընդգծել է բժիշկը, սուրճը տարբեր է լինում, այդ պատճառով էլ դրա մեջ կոֆեինի քանակը միշտ չէ, որ նույնն է։ «Սուրճի անվտանգ չափաբաժին կարելի է համարել օրական 1-2 բաժակը, այդ դեպքում այն կարող է նույնիսկ օգտակար լինել», — եզրափակել է նյարդաբանը:

Աղբյուր` Փաստինֆո