Փաստ ինֆո

Դատական համակարգում առանց այն էլ ողբալի վիճակում գտնվող դատական տեղեկատվական համակարգի գործունեությունը և փաստաթղթաշրջանառությունը վերջին ամիսներին պարալիզացված է, սակայն վերջին երկու ամիսներին համակարգի խաթարումը պատճառաբանվում է «կոյուղաջերի» առաջացրած «տեխնիկական» խնդիրներով։ Առ այս պահը պարզ չէ նաև՝ հնարավոր կլինի արդյո՞ք վերականգնել տվյալների բազան և ի վերջո՝ ինչ կարգով է իրականացվում գործերի մակագրումը։

Հիշեցնենք, որ «Դատալեքս» համակարգը վերջին տարիներին մշտապես խափանումներով է աշխատել՝ մեկ հոսանքի տատանումներն էին պատճառը, հիմա էլ՝ կոյուղաջրերը։ Բազմաթիվ դժգոհությունների արդյունքում, ի վերջո, հուլիսի 24-ին դատական դեպարտամենտը պաշտոնապես հայտնեց, որ հունիսի 28-ին վթար է եղել՝ ջրի արտահոսք, ինչի արդյունքում վնասվել են համակարգերը սպասարկող սերվերները:

«Վթարից սերվերների նման վնասումը պայմանավորված էր այն հանգամանքով, որ դեռևս 2017-2018 թվականներին սերվերային տարածքի նախագծումը և կառուցումը իրականացվել է թերացումներով, առնվազն` առանց անվտանգային լիարժեք կահավորման, և պատշաճ հաշվի առնված չէր կոյուղաջրի ջրագծերի տեղադրման մանրամասն սխեման»,- պատճառաբանել էին դեպարտամենտից՝ նշելով, թե չեն վերականգնվել 3 դատարանների՝ Սնանկության դատարանի, Արագածոտնի դատարանի, Վերաքննիչ վարչական դատարանի տվյալների բազան, առկա է դատական գործերի էլեկտրոնային քարտերում տեղեկությունների մուտքագրման անհնարինություն, խափանված է դատարանների միջև դատական գործերի էլեկտրոնային քարտերի տեղեկատվության փոխանցման և ստացման ծրագիրը, խափանված է բոլոր դատարանների ծրագրերի սերվերներից ինֆորմացիայի՝ դեպի Դատական դեպարտամենտի Տվյալների կենտրոն տեղափոխման տրանսպորտային համակարգը, ինչի արդյունքում չի թարմացվում նաև Դատալեքսը:

Հայտարարությունից ավելի քան մեկ ամիս անց «Դատալեքս» համակարգում դեռևս թարմացումներ չեն իրականացվում, ընդ որում, ոչ միայն չեն մուտքագրվում նոր գործեր, այլև՝ չեն թարմացվում նախկինում առկա գործերը։ «Փաստինֆո»-ն դիմել է Դատական դեպարտամենտին՝ պարզելու, թե երբ կսկսի գործել «Դատալեքս» համակարգը, արդյո՞ք այս պահին սարքին է գործերի մակագրման էլեկտրոնային համակարգը, սերվերներն ամբողջությամբ են վնասվել, թե՝ ոչ, արդյո՞ք վնասվել է նաև արխիվը։ Կառույցից, սակայն, մեկնաբանություն չտվեցին՝ ասելով, թե այս պահի դրությամբ հայտարարության տեքստին ավելացնելու ոչինչ չունեն։

Ասել է թե՝ համակարգը տևական ժամանակ է, ինչ կաթվածահար է, սակայն պատկան մարմինները չեն շտապում խնդրին լուծում տալ։ Ավելին՝ չի բացառվում, որ այս իշխանությունները փորձեն արխիվում փոփոխություններ իրականացնել, իսկ մակագրման համակարգի՝ հնարավոր չգործելը միայն ձեռնտու է՝ իշխանություններին հետաքրքրող գործերը ցանկալի դատավորներին մակագրելու համար, հատկապես, երբ նման պրակտիկա դատարանում արդեն եղել է՝ Գագիկ Ջհանգիրյանի պաշտոնավարման տարիներին, երբ իբրև մակագրման համակարգում ենթադրյալ միջամտության վերաբերյալ գործով իրավապահները առգրավեցին համակարգը, արդյունքում՝ գործերը մակագրվում են դատարանի նախագահների քմահաճույքներով և ցանկությամբ՝ «ձեռքով»։

Հեղինակ՝ Իզաբել Սահակյան

Աղբյուր` Փաստինֆո