Փաստ ինֆո

Իմ դեմ հարուցված շինծու մեղադրանքով քրեական գործը գործող իշխանության քաղաքական պատվեր է եղել, որի հետևանքով ես 6 ամիս ապօրինաբար ազատազրկվել եմ և գտնվել կալանավայրում, այնուհետև՝ 5 ամիս գտնվել տնային կալանքի տակ։ Գործող իշխանության հրահանգով և ԱԱԾ ՀԿԳ քննիչ Սպարտակ Պողոսյանի կողմից հորինված ապօրինի մեղադրանքով և Աջափնյակի ընդհանուր իրավասության Առաջին ատյանի քրեական դատարանի անարդարացի և ոչ իրավաչափ որոշումներով խախտվել է ազատ տեղաշարժվելու և իմ քաղաքական հայացքներն ու դիրքորոշումներն ազատ արտահայտելու սահմանադրական իրավունքը։ Այս մասին հրավիրված ասուլիսում ասաց պահեստազորի գնդապետ Ալբերտ Բազեյանը։

«Ես փաստում եմ, որ որևէ իշխանություն հավերժ չէ, ներկայիս նիկոլական իշխանությունը վաղ թե ուշ հեռացվելու է, Հայաստանում ձևավորվելու է նոր՝ ազգային և հայրենապաշտ իշխանություն։ Նիկոլ Փաշինյանը և նրա գաղափարակից պաշտոնյաները ենթարկվելու են ՀՀ օրենքով սահմանված կարգով դատական պատասխանատվության՝ Հայաստանին հանպատրաստից պատերազմի տանելու, տաղանդավոր ու հաղթական հայ ժողովրդին պարտության մատնելու, Արցախն ամբողջությամբ թշնամուն հանձնելու և Հայաստանի մի քանի տասնյակ քառակուսի կիլոմետր, պաշտպանական կարևոր գիծ թշնամուն թողնելու, 5 հազարից ավելի զինվորների զոհաբերելու համար։ Իմ գործունեությունն ուղղված է գործող պարտվողական և ապազգային իշխանությունների հեռացնելու, ՀՀ Սահմանադրությամբ նախատեսված կարգով արդար և օրինական արտահերթ ընտրությունների միջոցով ձևավորելու նոր ազգային իշխանություն։ Ակնկալում ենք, որ նոր ձևավորվելիք իշխանությունն իրականացնելու է մեր պետական շահերից բխող, մեր ժողովրդի նպատակները հետապնդող արտաքին ու ներքին քաղաքականություն»,- հայտարարեց Բազեյանը։

Նա հայտնեց, որ իր դեմ քրեական հետապնդումը հարուցվել է ԱԱԾ-ի կողմից հավաքագրված մեկ անձի՝ Արմեն Հարությունյանի, ցուցմունքի հիման վրա, որը առերեսման ժամանակ հայտարարել է, որ իրեն հեռակա կարգով է ճանաչվել, երբեք չի շփվել։

Աղբյուր` Փաստինֆո