Փաստ ինֆո

Թվայնացած աշխարհում մեկ րոպեն էլ բավարար է, որպեսզի հիշենք, թե ԲԴԽ նախագահ Կարեն Անդրեասյանը որպես «ՄԻՊ» ոնց էր փրփուրը բերանին խոսում կոռումպացված գործադիրից, վճռաբեկի նախագահից կախված դատավորներից, գնացուցակներից: Ու պարզվում է, որ այս մարդու նպատակը բնավ էլ դատավորներին անկախ դարձնելը չէր, այլ դատավորներին միայն իրենից կախված դարձնելը, որ նա բնավ էլ դատական իշխանության գնացուցակներից չէր բողոքում, այլ, որ այդ գնացուցակը ինքը չի սահմանում:

Մեր աղբյուրները պնդում են, որ, լինելով ԲԴԽ նախագահ, միևնույնն է, նա էլի բողոքում է: Այս անգամ բողոքում է, թե բացի իրենից դատավորներին էլի բան ասող կա և ասում են, որ հասել է նրան, որ բոլորին անջատեն դատական իշխանությունից և ասողը միայն ինքը լինի: Բայց միակ ասողից պահանջներն էլ են շատ, ու դրանց տակից դուրս գալը եւս դժվար է: Անկեղծության համար ասենք, որ դա հաճախ արվում է հենց ասելու համար պայքարող կոնկուրենտ կառույցների ջանքերով: ԲԴԽ նախագահի կողմից իրավիճակին չտիրապետելը կամ ստանձնածի դուրս չգալու տարբեր դեպքեր են արձանագրվել, օրինակ երբ առաջին ատյանում տապալված մի շարք գործեր փորձել են շտկել Վերաքննիչում (մեր աղբյուրները խոսում են Մամիկոն Ասլանյանի կալանքից ազատ արձակելու, ինչպես նաև Արա Բաբլոյանի գործի մասին): Եւ արդեն օրակարգում է ԲԴԽ նախագահի պաշտոնակության հարցը։

Շրջանառվող տեղեկությունների համաձայն՝ պաշտոնանկության գործում վերջին ակորդը եղել է Աննա Հակոբյանի ընկերուհի, ԲԴԽ-ից հեռացված Նաիրա Հովսեփյանի «ընտրվելը» Էթիկայի և կարգապահական հարցերի հանձնաժողովի անդամ: Մեր աղբյուրները պնդում են, որ այս տիկինը չի ընտրվել, բայց, այնուամենայնիվ, ինչպես ՔՊ վարչության անդամների ընտրությունների ժամանակ էր, կեղծել են մի քանի ձայն: Իրականում այս տիկնոջն այդքան քիչ ձայն տալը դատավորների դեմարշն էր Կարեն Անդրեասյանի դեմ, որն իր իր ծանրաձողը փաստացիորեն գցել է ոտքին, քանի որ խոստացել էր, որ տիկին Հովսեփյանի ընտրվելու հարցը ինքը կլուծի։ Ու «լուծեց»:

Բացի այդ, տեղեկություններ կան, որ դատական համակարգի հերոսը իշխանություններից մի «ղայդին երկրի» դեսպանի պաշտոն է ուզել՝ իր մատուցած ծառայությունների համար, սակայն նրան հասկացրել են, որ հեռու խաղա: Հետո իր լիազորությունների ժամկետի երկարացում է ուզել, ևս հասկացրել են, որ հեռու խաղա: Ու հիմա նա արդեն ցույց է տալիս, որ նեղացած է օրվա իշխանություններից, իբր այսքան կաշվից դուրս է գալիս, բայց չի գնահատվում:

Կարեն Անդրասյանը վերջերս աշխատանքային այցով մեկնել է Հոլանդիա, ասում են, որ այնտեղ, այսպես ասած, մտերմիկ շրջապատում, ոչ միայն բարձրաձայնել է իր դժգոհությունները, այլ վարչապետի մասին խոսել է հեգնական տոնով, իրոնիայով։ Վարչապետի մասին խոսելիս այլևս անունը չի տալիս, ոչ էլ նկարն է ցույց տալիս, այլ ձեռքով թրաշն է ցույց տվել: Ասում են՝ դա հիմա իշխանական շրջանակներում շատ տարածված է, ինչը նյարդայնացնում է վարչապետին: Այս այցելությունը ՍԴ դատավոր Վահե Գրիգորյանի սանիկի` Լուսինե Հակոբյան «Իրավունքի Եվրոպա միավորում» իրավապաշտպան հասարակական կազմակերպությունն (ՀԿ) է կազմակերպած եղել, իսկ Վահե Գրիգորյանի ու Կարեն Անդրեասյանի ջրերը վաղուց մի առվով չեն գնում։ Այս երկուսը, ՍԴ նախագահի քավոր Վլադիմիր Վարդանյանի հետ միասին մրցապայքարի մեջ են, թե իրավական հարցերով ով է առաջին վարչապետի մոտ։ Հիմնավոր է այն կարծիքը, որ հենց Վահե Գրիգորյանն է Կարեն Անդրեասյանի վոյաժների ժամանակ դրսևորած պահվածքի մասին տեղեկացրել վարչապետին: Մեր աղբյուրները հայտնում են, որ Կարեն Անդրեասյանի դեմ հավաքված կոմպրոմատներն այսքանը չեն ու եթե պաշտոնանկությունից հետո չարժանանա Դավիթ Տոնոյանի ճակատագրին, ապա պետք գոհ ու երջանիկ լինի։

Ինչևիցե, այդպես է միշտ, օգտագործել հետո շպրտել: Վերջին հաշվով՝ չես ուզում շպրտվել մի օգտագործվի:

Աղբյուր` Փաստինֆո