Փաստ ինֆո

Բնությունն այս տարի զգալի հարված է հասցրել գյուղերին, սակայն գյուղացին մնացել է միայնակ իր խնդիրների հետ ու կառավարությունը որեւէ փոխհատուցում չի հատկացրել։
Ինչպես արդեն հայտնել ենք՝ մայիսին տեղի ունեցած հեղեղումներից հետո Լոռու, Գեղարքունիքի մարզերում ամառվա ամիսներին տեղացել է խոշոր կարկուտ, մեծ վնասներ պատճառելով ցանքատարածություններին։

Տուժած բնակավայրերի թվում է նաեւ Ագարակը։ Կարկուտից ու հորդառատ արձրևների հետեւանքով բնակիչների կրած նյութական վնասը վարչական ղեկավարը՝ փրկարար ծառայության աշխատակիցների հետ համագործակցաբար, հաշվարկել եւ ուղարկել է մազկենտրոն՝ առանց մեծ հույսեր ունենալու, որ փոխհատուցում կտրվի ու ժամանակը ցույց տվեց, որ կառավարությունից որեւէ ակնկալիք չունենալն արդարացված էր։

Գավառ համայնքի Հայրավանք գյուղն էլ որեւէ փոխհատուցում պաշտոնապես չի ստացել, թեեւ վնասների մասին տվյալները նույնպես ուղարկել են մարզկենտրոն, սակայն այստեղ փորձում է օգտակար լինել քաղաքապետը։

«Պաշտոնական փոխհատուցում որպես այդպիսին չի եղել, բայց դե մեր քաղաքապետը աջակցում է երբեմն ֆինանսապես», - «Փաստինֆո»-ին ասաց վարչական ղեկավար Սևան Բադոյանն ու ավելացրեց, որ կառավարությունից ասում են ապահովագրեք բերքը։

Նրա փոխանցմամբ՝ իրենց տարածքում հիմնականում 3 տեսակի ցանքս են անում՝ կարտոֆիլ, գարի, ցորեն, ծառեր չունեն ու ինքը համաձայն է այդ մոտեցման հետ, ապահովագրելը ճիշտ է։

Տեղեկություններ կան, որ բնության դաժան կատակներին միացել են նաեւ կրծողները, եւ Բադոյանը հաստատեց, որ իսկապես նման խնդիր ունեն ու անհրաժեշտություն է ընդհանուր պայքար մղել մկների դեմ։

«Եթե մեկը կրծողի դեմ դեղ է դնում, հարևանը չի անում, ապա դնողի արածն էլ է ջուրը գցում, որոշ կորուտներ ունեցել ենք , ճիշտ եք»,- ասաց համայնքի ղեկավարը՝ նշելով, որ բարեբախտաբար բերքն արդեն հավաքել են եւ կորուստը մեծ չի եղել, մեկ օրվա հավաքելու բերք է մնացել։

Աղբյուր` Փաստինֆո