Փաստ ինֆո

Հոգեկան խանգարումները սովորաբար ուղեկցվում են վարքի խանգարումներով։ Եթե մարդն աղբ ու ավելորդ իրեր է կուտակում կամ տունը չի մաքրում, դա կարող է նշան լինել, որ նա ունի մի շարք հոգեկան հիվանդություններ։ Այս մասին հայտնում է հոգեբույժ և հոգեթերապևտ Ալեքսեյ Վիլկովը։

Նա ասում է, որ Պլյուշկինի համախտանիշը, որը հաճախ հանդիպում է տարեց մարդկանց մոտ, կարող է լինել դեպրեսիայի նշաններից մեկը։

«Հոգեբուժության մեջ կա Պլյուշկինի համախտանիշ, երբ մարդը տուն է բերում տարատեսակ անպետք իրեր, այդ թվում՝ աղբ։ Նման մարդու մոտ աստիճանաբար աղբի սարեր են հայտնվում բնակարանում»,- պարզաբանել է փորձագետը։

Բացի այդ, աղբ կուտակելու համախտանիշը կարող է ցույց տալ, որ մարդը օբսեսիվ-կոմպուլսիվ խանգարում ունի, իսկ որոշ դեպքերում տանը անհարկի իրերն ու աղբը պահելու սովորությունը վկայում է այնպիսի լուրջ հիվանդության մասին, ինչպիսին է շիզոֆրենիան՝ նկատել է բժիշկը։

Ալեքսեյ Վիլկովն ընդգծել է, որ եթե մարդը չի ձգտում իր տունը մաքուր և կոկիկ պահել, դա կարող է լինել երկարատև դեպրեսիայի դրսևորում։

«Տվյալ դեպքում մարդու մոտ առկա է լուրջ, շատ արտահայտված ապատիա, անտարբերություն իր և ուրիշների նկատմամբ»,- նկատել է հոգեբույժը։

Վիլկովը խորհուրդ է տալիս՝ եթե մարդու բնակարանում աղբի քանակն աճում է ու նա չի կարողանում հստակ բացատրել իր վարքագծի պատճառները, պետք է անհապաղ դիմել մասնագետի՝ ստուգելու նրա հոգեկան առողջության վիճակը։

Աղբյուր` Փաստինֆո