Փաստ ինֆո

Մեր եկեղեցիները կառուցված են աստղագիտական ճշգրտությամբ, որոնց յուրաքանչյուր պատուհանը մեկ համաստեղության է նայում։ «Փաստինֆո»-ին ասաց բանաստեղծուհի Անահիտ Այվազյանը՝ արձանագրելով, որ «Զորաց քարերը»  մեր աստղագիտական գիտելիքների հնագույն վկայությունն են, այն մեր հնագույն աստղադիտարանն է։

Ինչպես արդեն հայտնել ենք՝ արհեստածին Ադրբեջանի կողմից իրականացվող մշակութային ցեղասպանության քաղաքականությունն արդեն հասել է «Զորաց քարերին» ու հայկական Քարահունջը փորձում են սեփականաշնորհել։ Իհարկե, սա այնքան անհեթեթ է, որին կարելի էր նաեւ չանդրադառնալ, բայց նաեւ փաստ է, որ Ադրբեջանը բացահայտ կեղծում է պատմությունը ու իր նավթի օգնությամբ այդ կեղծիքը տեղափոխում միջազգային մամուլի էջեր՝ փորձելով իր համար ստեղծել նոր պատմություն։

Ու ոչինչ, որ Քարահունջն ունի հազարամյակների պատմություն, երբ Ադրբեջան անունն ընդհանրապես չէր էլ նշմարվում։
Փաստենք, որ Քարահունջի տարիքի մասին առավել խորը ուսումնասիրությունը կատարել է ակադեմիկոս Պարիս Հերունին։ Նա «Հայերը և հնագույն Հայաստանը» գրքում մանրամասն ներկայացրել է իր կատարած աստղագիտական, ֆիզիկական և մաթեմատիկական հաշվարկները՝ կատարված երեք տարբեր մեթոդներով, որոնցով հիմնավորել է, որ Քարահունջը կառուցվել է ավելի քան 7500 տարի առաջ։ Հատկանշական է նշել, որ Սթոունհենջի տարիքը որոշվել է հենց Հերունու կողմից կիրառված 1-ին մեթոդով, ինչը բավականին տարածված է գիտնականների մոտ։

Մեծ Բրիտանիայում եւս կա հնավայր, որ շատ նման է մեր Քարահունջին։ Այն բաղկացած է երեք կառույցների մաս կազմող ուղղահայաց քարերից։ Ա.Այվազյանի փոխանցմամբ՝ բրիտանացի գիտնական Սիլվանը ժամանակին գտել է հայկական Քարահունջի ու Մեծ Բրիտանիայի Սոլսբերի Սթոունհենջի կապը, եկել Հայաստան, այցելել Սյունիք՝ հնագույն քաղաքակրթության մասնագետ- աստղաբան Վազգեն Գևորգյանի հետ։ «Այս երկու հնավայրերը` հնագույն քաղաքակրթության մասին պատմական նմանություն ունեն»,- ասաց Այվազյանը՝ արձանագրելով, որ գիտնականները Քարահունջը համարում են հայերի հնադարյան քաղաքակրթության անձնագրերից մեկը։

«Քարահունջի ամեն մի անցքն ուղղված է ինչ-որ մի համաստեղության, եթե հիշողությունս չի դավաճանում՝ 63-րդ կամ 64-րդ անցքն ուղղված է Հայկի համաստեղությանը, այլ կերպ ասած՝ Օրիոնի համաստեղությանը», - նշում է բանաստեղծուհին, որը ուսումնասիրել է աստղագիտություն տարիներ շարունակ։

Մեր զրուցակիցը պատմեց, որ իր նման ուսումնասիրողների խմբով մի քանի անգամ եղել են Սյունիքի մարզում՝ հենց օգոստոսի 11-ին, որպեսզի Նավասարդի գիշերը դիտեն աստղերը։

«Օգոստոսի 11-ի գիշերը՝ ժամը 4-ին աստղերը պատմում են Վահագն Աստծո մի գործողության մասին, երբ կույսի համաստեղությանն ազատում է վիշապից, որը հետաքրքիր ձեւով պատկերվում է տիեզերքում միմիայն հայկական տոմարով Նավասադի գիշերը՝ ուղիղ ժամը 04։00-ին»,- ասաց տիկին Անահիտը։

Դառնալով Զորաց քարերի անցքերից երևացող Հայկի համաստեղությանը՝ Ա.Այվազյանը արձանագրեց, որ մենք հայ կոչվում ենք Հայկի անունով, ըստ հայկական դիցաբանության՝ աշխարհին ուղղորդող այդ համաստեղության՝ Հայկի հետնորդներն ենք։ Նա ցավում է, որ մեր դպրոցներում հեքիաթի ձևով են ներկայացնում Հայկի ու Բելի լեգենդը, բայց Հայոց դիցաբանությունը խորությամբ չի բացատրվում, չի վերլուծվում։ Մինչդեռ՝ դա հայ ժողովրդի ծննդյան հիմքի պատմությունն է , եւ դրա համար էլ, ըստ բանաստեղծուհու, ադրբեջանցիները ուզում են յուրացնել այդ ասղագիատական հնավարը։

«Երբ խլում ես ազգի պատմությունը, անցյալը, ապա պետք է սկսես ակունքներից։ Արցախում հայկական եկեղեցիների մի մասը վերացնում են, մյուս մասը համարում ուդիական ։ Սա շարունակական մշակութային ցեղասպանություն է, որ վարվում է հայ ժողովրդին վերջնականապես ակունքներից ու հիշողությունից զրկելով՝ վերածելու արմատների մասին մոռացած մի ժողովրդի, որի աշխարհից վերանալն արդեն ժամանակի հարց կլինի», - ընդգծեց մեր զրուցակիցը։

Աղբյուր` Փաստինֆո