Փաստ ինֆո

Երևանի ընդհանուր իրավասության քրեական դատարանում՝ դատավոր Տաթևիկ Գրիգորյանի նախագահությամբ, ՍԴ նախկին նախագահ, ՍԴ դատավոր Հրայր Թովմասյանի գործով այսօր պաշտպանական ճառը չհրապարակվեց։ Դատական սանկցիայի հետևանքով նիստերի դահլիճից 10 ժամով հեռացված Հրայր Թովմասյանի և նրա պաշտպանների բացակայությամբ ընթացող նիստերի, այդ թվում՝ մեղադրական ճառի հրապարակման նիստերի արձանագրությունը կտրամադրվի պաշտպանության կողմին։

Ինչպես արդեն տեղեկացրել ենք՝ նախորդ դատական նիստերի ընթացքում հանրային մեղադրողը ճառով միջնորդել է մեղավոր ճանաչել Հրայր Թովմասյանին և դատապարտել ազատազրկման՝ 7 տարի ժամկետով։

«Փաստինֆո»-ի թղթակցի հաղորդմամբ՝ այսօրվա նիստի մեկնարկին գործով որպես Հրայր Թովմասյանի պաշտպան ներգրավվեց փաստաբան Միհրան Պողոսյանը, որը բոլորովին վերջերս՝ նախորդ դատական նիստերի ընթացքում դադարեցրել էր պաշտպանություն իրականացնել։ Պաշտպան Արամ Օրբելյանը միջնորդեց՝ իրեն տրամադրել նախորդ նիստերի արձանագրությունների կրիչը՝ ծանոթանալու և հասկանալու, թե ինչ է կատարվել իրենց բացակայությամբ նիստերի ընթացքում՝ պաշտպանական ճառը պատրաստելու համար։ Պաշտպանը նաև արձանագրեց, որ դատարանը տեղյակ է եղել, որ ինքը երկրում չէ, արձակուրդում է գտնվել և որևէ ծանուցում չէր ստացել՝ նիստին մասնակցության և միայն ԶԼՄ-ներից էր իմացել, որ նիստ է հրավիրված։ Դատարանը միջնորդությունը բավարարեց։ Ինչ վերաբերում է ծանուցման հասցեին, ապա փաստաբանը նշեց, որ ծանուցումներն իբրև գնացել են Շերամի փողոցում գտնվող հասցե, որի հետ ինքն առհասարակ որևէ կապ չունի, միևնույն ժամանակ, պարզել է պետք՝ ով է իր անունից ստացել ծանուցում։
Նախագահող դատավորը շտապեց արդարանալ և ապացուցել, թե ինչպես են Թովմասյանը և նրա պաշտպանները միտումնավոր խափանում դատական նիստերը։ Դատավոր Տաթևիկ Գրիգորյանը նշեց, որ ընդհանուր առմամբ նշանակված են եղել 132 դատական նիստեր, որոնցից 73-ը հետաձգվել են ամբաստանյալների և պաշտպանների բացակայության պատճառով, որոնցից էլ միայն թվով 31-ը՝ Հրայր Թովմասյանի բացակայության պատճառով։

«Հրայր Թովմասյանի բացակայությունների գերակշիռ մասը պայմանավորված են եղել վերջինիս՝ ՍԴ-ում դատական կազմերի նիստերին մասնակցելով, այն դեպքում, երբ դատարանը շաբաթական մեկ անգամ դատական նիստեր նշանակելու որոշում կայացնելիս՝ որոշել է նիստերը նշանակել հինգշաբթի օրը, քանի որ այդ օրերին ՍԴ-ում նիստեր չեն հրավիրվում, սակայն հետագայում ՍԴ-ից ստացված գրությամբ հաստատվել է, որ դատական կազմի նիստեր նշանակվում են նախագահի կողմից, իսկ այդ ժամանակահատվածում նախագահող եղել է Հրայր Թովմասյանը»,- ասաց դատավորը՝ նշելով, թե Թովմասյանը միտումնավոր է կազմի նիստերը նշանակել դատական նիստերի օրերին՝ խոչընդոտելու նպատակով։

Բացի այդ, նախագահողը նշեց, թե դատական նիստերը հետաձգվել են նաև առողջական խնդիրների պատճառով, իսկ միտումն այն է, որ հաջորդաբար են եղել այդ խնդիրները։

Դատական նիստը հետաձգվեց՝ մինչև օգոստոսի 28-ը։

Լրագրողների հետ զրույցում, անդրադառնալով դատավոր Տաթևիկ Գրիգորյանի հայտարարությանը, ամբաստանյալների, պաշտպանական թիմերի պատճառով դատական նիստերը հետաձգելու մասին, փաստաբան Արամ Օրբելյանն ասաց, որ 132 նիստերը բոլորը հետաձգվել են, առանց բացառության՝ մի մասը տևել է 10 րոպե, մի մասը՝ 4 ժամ։

«Դատական նիստերի ժամանակ որևէ կրկնություն, արհեստական պրոցես չի եղել»,- ասաց նա։
Միևնույն ժամանակ դատավորի այս վարքագիծը փաստաբանը պայմանավորեց ԶԼՄ-ների ներկայությամբ, նշեց՝ դատական դեպարտամենտի ֆիլմի սցենար էր։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։ Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Մանրամասները՝ տեսանյութերում

Հեղինակ՝ Իզաբել Սահակյան

Աղբյուր` Փաստինֆո