Փաստ ինֆո

Կալանավորներին ուղեկցող գումարտակի պայմանները խայտառակ են։ Մարդկային տարրական պայմաններ պետք է ապահովել, որ չստացվի, որ կալանավորներն ավելի վատ վիճակում են տեղ հասցվում, քան՝ Լարսի անցակետով լոլիկը։ Այս մասին դատարանում հայտարարեց Արմեն Աշոտյանը՝ բարձրաձայնելով համակարգային խնդիրները։

«Փաստինֆո»-ի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր հետաձգվեց ՀՀԿ փոխնախագահ Արմեն Աշոտյանի և մյուսների գործով դատական նիստը։ Դատական նիստում Արմեն Աշոտյանն ուշադրություն հրավիրեց այն հանգամանքին, որ դատավորը նախորդ նիստին նախապես իմացել էր, որ վկան չէր ներկայանալու նիստին, հասցրել էր այլ գործով նիստ հրավիրել, թեև պատճառաբանել էր, որ ժամանակ չի եղել՝ հրավիրելու այլ վկաների։ Աշոտյանը խնդրեց նիստերի ժամանակը հավուր պատշաճի օգտագործել։ Մյուս հանգամանքը, ինչի վրա ուշադրություն է հրավիրել Աշոտյանը՝ ուղեկցող գումարտակի պայմանների խայտառակ լինելն է, նշում է՝ աշխատակազմ չունեն, մեքենա չունեն, կալանավորների համար անվճար քաղաքային տուռեր են կազմակերպում՝ «փլած» մեքենաներով՝ մինչև դատարան հասցնեն։

«45 րոպե ուշացումով նիստ ենք սկսում։ Խոսքը միայն այսօրվա մասին չէ։ Գրեթե ամեն անգամ՝ մի տեղ կես ժամ, մի տեղ՝ 40 րոպե ուշացումով նիստ ենք սկսել, քանի որ այս մարդիկ՝ իրենց «պայթած» մեքենաներով բոլորին բերել դատական նիստերի»,- ասաց Արմեն Աշոտյանը՝ նշելով, որ խնդիրն աշխատակիցների մեջ չէ, բայց այդ մարդիկ չեն կարող աշխատակազմի և մեքենաների բացակայության պարագայում ապահովել կալանավորների և դատապարտյալների պատշաճ ներկայացումը նիստերին, որ չխոչընդոտվի նիստերի իրավունքը։

«Այսինքն՝ այսօր նիստ էիք անում, 45 րոպե ուշացումով երկու ժամանոց նիստից ինչ էինք հասկանալու։ Խոսքը միայն իմ մասին չէ, խոսքը բոլոր անազատության մեջ գտնվող անձանց մասին է, որոնց դատական նիստերը շարունակվում են։ ՆԳՆ նախարարը, ոստիկանապետը մի հատ զբաղվեն այս հարցով, ինչքան կարելի է անմարդկային պայմաններում՝ 8-9 հոգով մարդկանց խցկել պայթած մեքենաների մեջ, որոնք ճանապարհի կեսից փչանում են»,- ասաց Աշոտյանը՝ նշելով, որ դա իրավունքների և անվտանգության հարց է։
Աշոտյանը խնդրեց հարցը կարգավորել, որ այլևս ինքը և մյուս կալանավորները չկորցնեն դատական նիստերի թանկարժեք ժամկետը, ինչպես նաև՝ մարդկային տարրական պայմաններ ապահովել, որ չստացվի, որ կալանավորներն ավելի վատ վիճակում է տեղ հասցվում, քան՝ Լարսի անցակետով լոլիկը։
Նախագահողը նշեց, որ դատարանը որևէ լիազորություն որպես այդպիսին չունի, սակայն զրկված չէ՝ խնդիրը բարձրաձայնելու հնարավորությունից։ Դոլմազյանը նշեց, որ ոստիկանական համակարգում նոր ստորաբաժանման ծառայության միջոցով խնդրին լուծում պետք է, որ լինի՝ սեպտեմբեր ամսից։ Փաստաբան Տիգրան Աթանեսյանն էլ արձագանքեց՝ «ի վերջո, եթե պարոն Աշոտյանի մասին չեն մտածում, թող՝ իրենց մասին մտածեն»։
Արմեն Աշոտյանն էլ ավելացրեց՝ լիազորություն չունենալու մասին պնդումը բացարձակապես փաստարկ չէ կալանավորի աչքերում։

«Դուք ինձ ազատազրկել եք՝ որպես պետության՝ դատական իշխանության ներկայացուցիչ։ Ինձ պետությունն է ազատազրկել։ Թե պետության՝ աջ ձեռքը, ձախ ձեռքը ինչ խնդիրներ ունեն, դա ինձ չի հետաքրքրում, եթե պետությունն ինձ ազատազրկել է, ապա պարտավոր է ապահովել իմ իրավունքները»,- ասաց Աշոտյանը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո