Փաստ ինֆո

Ես տեղյակ եմ, որ ՀՀ-ում 20- 25 գործարան կոնյակ են արտադրում եւ իրենք խաղողի բավարար մթերումներ չեն կատարում։ Մենք կարող ենք ենթադրել, որ որ որոշ գործարարներ կարող են անբարեխիղճ լինել ու օգտագործել տարբեր սպիրտներ, ընդ որում՝ ոչ թե խաղողի սպիրտ, որը պարտադիր է կոնյակի համար։ «Փաստինֆո»-ի հետ զրույցում ասել է Հայաստանի Գործատուների Հանրապետական Միության նախագահ Գագիկ Մակարյանը։

Ինչպես արդեն հայտնել ենք՝ ՌԴ-ի «Անտիկոնտրաֆակտ» ասոցիացիայի ու Ռուսաստանի կոնյակ, սպիրտ և ալկոհոլային խմիչք արտադրողների միության համատեղ հետազոտության արդյունքներով հայտարարվել է, որ ռուսական խանութներում վաճառվող հայկական կոնյակի գրեթե 90%-ն անվտանգ չէ, իսկ արտադրանքի մոտ կեսը պարունակում է ոչ խաղողի սպիրտ: Ավելին՝ նշվում է, որ դիմել են Ռուսաստանի իրավասու մարմիններին՝ ՀՀ-ից ներկրվող ալկոհոլային արտադրանքի նկատմամբ լրացուցիչ հսկողության միջոցներ ձեռնարկելու խնդրանքով։

Գ.Մակարյանը ուշադրություն հրավիրեց այն փաստի վրա, որ ռուսական կողմը կոնկրետ ընկերությունների անուններ չի նշել։ Ավելին, նա տեսականորեն չբացառեց, որ գուցեեւ լաբորատոր ստուգումների արդյունքների մասին տեղեկությունն ունի քաղաքական ենթատեքստ, բայց ինքն անձամբ կարծում է, որ նման ենթատեքստ չկա։

Ըստ նրա, որոշ ընկերություններ հնարավոր է վերցնեն խուրմայի, բազուկի կամ այլ մթերքից ստացված սպիրտ և դրան խաղողի էկստրակտ ավելացնեն, ինչը ոչ ալկոհոլային լուծույթ է։ «Դա խաղաղի համի ու խաղողի բաղադրիչները սպիրտի մեջ կարծես տեղավորելու նպատակ ունի, որ նմանվի խաղողի սպիրտի։Հետո կարող է դա մի քիչ պահեն կոնյակի տակառի մեջ, մի քիչ գույն տան, ինչի արդյունքում ստացվում է ավելի էժան ու հնարավորություն է տալիս Ռուսաստանի շուկա մուտք գործել էժան գնով»,- ասաց Գ. Մակարյանը՝ ավելացնելով, որ ՌԴ լաբորատորիաները կարողանում են դա ստուգումներով բացահայտել։

Ինչ վերաբերում է անորակ արտադրանքի բարձր տոկոսայնությանը, ապա, ըստ Գ.Մակարյանի, հնրավոր է զուգադիպություն է եղել՝ մի քանի գործարարներ միաժամանակ են արտահանել նմանատիպ կոնյակներ,- այդ հայտարարության մեջ , որ գրված է, որ 90 տոկոսը չի համապատասխանում։ Նրա փոխանցմամբ՝ կոնյակի հետ կապված նախկինում եւս եղել են վեճեր՝ խաղողի սպիրտ է օգտագործվում, թե ոչ։

Գ. Մակարյանը կարծում է, որ մեր պետական մարմինները մի քիչ ավելի ուշադիր պետք է լինեն այն գործարարների նկատմամբ , որոնք բավարար քանակով խաղող չեն մթերում կամ պահեստներում խաղողի սպիրտ չունեն կուտակված։ Դա հարկավոր է ստուգումներով պարզել։

Միության նախագահը հավանական համարում, որ Հայաստանում լաբորատոր ստուգումներն անհրաժեշտ որակով չլինեն, որակյալ տեխնիկա չունենան, որ բացահայտեն, բայց ռուսական կողմը ունի և բացահայտում է։ Մակարյանը հիշեցրեց, որ մեկ տարի առաջ էլ կաթնամթերքի շուկայում այդ երևույթը եղավ ու պարզվեց, որ 20 կաթնամթերք արտադրողների հանդեպ արգելանքի պատճառը 3- 4 ընկերություն էր, որոնք անբարեխիղճ են եղել։

«Ես հակված եմ ենթադրելու, որ մեր կողմում է պրոբլեմը, այլ ոչ թե քաղաքական ենթատեքստ պետք է որոնենք, իմ կարծիքը դա է», - ասաց Հայաստանի Գործատուների Հանրապետական Միության նախագահը։

Աղբյուր` Փաստինֆո