Փաստ ինֆո

Հայկական «GG» ընկերության վերաբերյալ քրեական վարույթով դեռևս որևէ անձի նկատմամբ քրեական հետապնդում չի իրականացվում։ Այս մասին «Փաստինֆո»-ի հետ զրույցում ասացին Քննչական կոմիտեից՝ նշելով, որ ակտիվ նախաքննությունը շարունակվում է։

Հիշեցնենք, որ ընկերության նկատմամբ ճնշումներին նոր թափ էր հաղորդվել այն բանից հետո, երբ ընկերության հիմնադիր Խաչատուր Գրիգորյանն իր աջակցությունն էր հայտնել Նիկոլ Փաշինյանի հրաժարականի պահանջով Բագրատ արքեպիսկոպոս Գալստանյանի առաջնորդած շարժմանը, ինչին հաջորդել է նաև Նիկոլ Փաշինյանի աշխատակազմի ղեկավարի գրառումը։ Արդյունքում՝ շուրջ մեկ տարվա վաղեմության քրեական վարույթի շրջանակներում հունիսին քննչական կոմիտեն խուզարկություններ է իրականացրել ընկերության հասցեներում, առգրավել համակարգիչներ; Քրեական գործը, որը հարուցվել է մեկ տարի առաջ՝ մայիսին, քննվում է հարկեր չվճարելու և փողերի լվացման հոդվածներով։ Իրականացվող հետապնդումների վերաբերյալ ընկերությունը հայտարարություն էր տարածել՝ նշելով, որ հայկական «ջիջի» ընկերության դեմ հարուցվել է ակնհայտ անհիմն և անօրինական քրեական վարույթ, որի միակ դրդապատճառը ընկերության հիմնադիր Խաչատուր Գրիգորյանի ակտիվ քաղաքացիական դիրքորոշումը և հասարակական գործունեությունն է:

Բարձրացված աղմուկից և հետապնդումներից շուրջ երկու ամիս անց պարզվեց, որ քրեական գործով առ այս պահը հետապնդում չի իրականացվում որևէ անձի դեմ, սակայն «ակտիվ նախաքննություն» է իրականացվում։ Ասել է թե՝ շարժման ակտիվ փուլում մեծ աղմուկով հետապնդում իրականացվեց բիզնեսի նկատմամբ, սակայն՝ շարժման մեղմացման հետ զուգահեռ հետապնդումները ևս հանդարտվեցին, իսկ քրեական գործը պահվում է y’;fr մահակ և շանտաժի գործիք՝ անհրաժեշտության դեպքում դրա մասին ևս մեկ անգամ հիշեցնելու և հետապնդում իրականացնելու համար։

Հեղինակ՝ Իզաբել Սահակյան

Աղբյուր` Փաստինֆո