Փաստ ինֆո

ԵԱՀԿ Մինսկի խմբի լուծարման մասին դրույթ կամ որեւէ հիշատակում դժվար թե լինի Խաղաղության պայմանագրում, դրա մասին հայտարարություն կլինի մինչեւ այդ պայմանագրի ստորագրումը, եթե Նիկոլ Փաշինյանն ընդունի Ալիեւի հրավերն ու մասնակցի «COP 29» համաժողովին։ «Փաստինֆո»-ի հետ զրույցում նման կարծիք է հայտնել քաղաքագետ Խաչիկ Գալստյանը։

Ինչպես արդեն հայտնի է՝ Ադրբեջանը խաղաղության համաձայնագրի ստորագրման, դրա նախաստորագրման համար Հայաստանից պահանջել է փոխել Սահմանադրությունը, ինչպես նաեւ համատեղ դիմել ԵԱՀԿ Մինսկի խմբի լուծարման համար։ «Ազատություն»-ը, մասնավորապես, հետաքրքրվել էր Արտգործնախարարությունից՝ արդյոք Ադրբեջանը Մինսկի խմբի լուծարումը դարձնում է նախապայման՝ խաղաղության պայմանագիր ստորագրելու համար, ինչո՞ւ Երևանը համաձայն չէ լուծարմանը և հնարավո՞ր է, որ առաջիկայում Հայաստանը մտքափոխվի և Բաքվի հետ լուծարման համատեղ դիմում ներկայացնի ԵԱՀԿ-ին։

Այս հարցերին Արտգործնախարարությունը մեկ նախադասությամբ է պատասխանել․ - «Հայկական կողմը Մինսկի գործընթացի շարունակականության հարցը կարող է դիտարկել հարաբերությունների համապարփակ կարգավորման և առաջին հերթին՝ խաղաղության պայմանագրի կնքման համատեքստում»։

Արձագանքելով ԱԳՆ-ի այս մեկնաբանությանը՝ քաղաքագետ Խ.Գալստյանը կարծիք հայտնեց, որ Բաքվում կայանալիք «COP 29» համաժողովին մասնակցելու հրավերն ընդունելու եւ Բաքու մեկնելու դեպքում, ապա բացառված չէ, որ հենց առիթն էլ օգտագործելով նման հայտարարություն հնչեցվի։

«ԵԱՀԿ Մինսկի խումբը 32 տարվա ինստիտուցիոնալ կառույց է, որը միակն էր,, որ ուներ միջազգային մանդատ՝ ղարաբաղյան հակամարտության կարգավորման լուծման համար։ Նրա գոյությունը խոսում է այն մասին, որ ղարաբաղյան կոնֆլիկտի էջը դեռ փակված չէ, մինչդեռ լուծարմամբ, փաստացի, փակում ենք նաև Ղարաբաղյան կոնֆլիկտի էջը», - «Փաստինֆո»-ին ասաց քաղաքագետ Խաչիկ Գալստյանը ։

ԱԳՆ-ի անատամ, անորոշ ու ոչինչ չասող հայտարարությունը, Խ. Գալստյանի գնահատմամբ, վկայում է, որ ԵԱՀՄ Մինսկի խմբի լուծարումը Բաքվի հերթական նախապայմանն է։

«Ադրբեջանի նախագահ Իլհամ Ալիևը ԵԱՀԿ Մինսկի խմբի լուծարման անհրաժեշտության մասին արդեն բարձրաձայնել է մի քանի շաբաթ առաջ։Ցավն այն է, որ հենց նախաձեռնող կողմ որպես առաջին պլան մղում է ՀՀ-ին, որ պետք է դիմեն, որպեսզի այն լուծարվի, քանի որ, ըստ իրենց (Ադրբեջանի – խմբ.), հիմնախնդիրը կարգավորված է, լուծված է»,- նշեց Գալստյանը։ Վերջինս նաեւ ուշադրություն հրավիրեց այն փաստի վրա, որ Փաշինյանի կառավարությունն անգամ Սյունիքի դեմոգրաֆիական փոփոխության մասին Ալիեւին ոչի մի հակադարձում չի անում՝ ի տարբերություն Իրանի։

«Դուք կարո՞ղ եք ասել մի փոքրիկ դրվագ, որ Նիկոլ Փաշինյանի ռեժիմը կարողանար հակադարձել Ալիևին։ «Զանգեզուրի միջանցքի» մասին են բարձրաձայնում, բայց ես վստահ եմ, որ զուտ խաղաղության պայմանագրի տեքստից ծանրությունը հանել են և ավելի ազատ են ձեռքերը թողել, որ ինչ ուզենան, ինչպես ուզենան անեն և ոչ մի հարցով ձեռքերը կաշկանդված չլինի։ Իրանի հոգևոր ղեկավարությունը մեզնից ավելի հայասեր է և մեր ազգային շահերը ավելի լավ է պաշտպանում, քան մենք, որովհետև հստակ հայտարարվել է կարմիր գծերի մասին, որ ոչ մի տարածքային փոփոխություն, այդ թվում նաև դեմոգրաֆիական փոփոխություն թույլ ընդունելի չէ։ Իսկ հայկական կողմից որեւէ հայտարարություն չի եղել Սյունիքի մարզ՝ ադրբեջանցիների վերադարձի մասին, ոչ մի արգելող հայտարարություն չի եղել» ,- ասաց Գալստյանը։

Աղբյուր` Փաստինֆո