Փաստ ինֆո

Երևանի ընդհանուր իրավասության քրեական դատարանը՝ դատավոր Արման Հովհաննիսյանի նախագահությամբ, մերժեց «Իմնեմնիմի» փոդքաստի հեղինակներ Նարեկ Սամսոնյանի և Վազգեն Սաղաթելյանի նկատմամբ էլեկտրոնային հսկողություն կիրառելու մասին դատախազի միջնորդությունը։

«Փաստինֆո»-ի թղթակցի հաղորդմամբ՝ հանրային մեղադրողը հայտարարեց, թե Նարեկ Սամսոնյանի նկատմամբ ընտրված վարչական վերահսկողությանը վերաբերող 03.06.2024 թվականին կայացրած դատարանի համապատասխան ակտում վրիպակներ կան և առաջարկեց ուղղել այն։

Մեղադրողն առաջարկեց Նարեկ Սամսոնյանի նկատմամբ կիրառել շաբաթական երեք անգամ բնակության վայրի մոտ գտնվող պրոբացիայի ծառայությունում գրանցվել և նրա վարքագծի հսկողությունն իրականացնել օրենսդրությամբ սահմանված հատուկ էլեկտրոնային միջոցնեով՝ հիմք ընդունելով Վերաքննիչ դատարանի ներկայացրած դիրքորոշումը։ Պաշտպան Ռուբեն Մելիքյանը, սակայն, առարկեց միջնորդության դեմ՝ ուշադրություն հրավիրելով այն հանգամանքին, որ որոշման այս հատվածը պարտադիր չէ կատարման համար։ Ըստ Մելիքյանի՝ Նարեկ Սամսոնյանը շաբաթական մեկ անգամ գրանցվում է պրոբացիոն ծառայությունում, անհրաժեշտություն չկա, որ դատական ակտում դատավորը դա գրի, եթե խոսքը նվազագույն սահմանափակման մասին է, օրենքի ուժով դա գործում է։ Ինչ վերաբերում է էլեկտրոնային սարքին, ապա Մելիքյանը նշեց, որ դա վրիպակ չի համարում, գտնում են, դա տրամաբանական է՝ ելնելով սահմանափակումների բնույթից։

Նարեկ Սամսոնյանը դիրքորոշում հայտնեց՝ նշելով, որ օրենքի ուժով չկա պարտադիր պայման՝ էլեկտրոնային սարք տեղադրելու։ Ավելին, Սամսոնյանը գտնում է, որ դատախազներից մեկն իր նկատմամբ ընդգծված բացասական վերաբերմունք ունի։

«Դատախազներից մեկն ունի հստակ անձնական վերաբերմունք իմ նկատմամաբ, և ես հույս ունեմ, որ մի օր արդարադատության համակարգն կլինի այնպիսին որ նման մարդիկ տեղ չեն ունենա համակարգում»,-ասաց նա, ինչին արձագանքելով նախագահող դատավոր Արման Հովհաննիսյանն ասաց, որ ակնարկներով պետք չէ խոսել, եթե հստակ փաստարկներով միջնորդություն ներկայացվի, դա կքննարկվի։
«Եթե ուզում եք իմանալ, թե որտեղ է այդ պահին Նարեկ Սամսոնյանը, ապա դիմեք ձեր ոստիկանության կամ ԱԱԾ-ի օպերատիվնիկներին, նարանք շատ լավ գիտըեն իմ տեղը՝ ամենօրյա ռեժիմով, երբ ես գնում եմ հանգստանալու՝ իր հետևից այդ մարդիկ գալիս են երբեմն բարևում են ասում են դե ստիպված ենք»,- ասաց Սամսոնյանը՝ պնդելով որ անիմաստ է էլեկտրոնային միջոցների կիրառումը։

Դատարանը, լսելով կողմերին, մերժեց միջնորդությունը՝ նշելով, որ ծանոթացել է Վերաքննիչ դատարանի որոշմանը, ընդունել ի գիտություն, սակայն նոր որոշում կայացնելու անհրաժեշտություն չի տեսնում, քանի որ դատարանը, կայացնելով որոշումը, արդեն իսկ կայացրել է այն տրամաբանությամբ, որ, եթե վարչական հսկողություն է սահմանվում, ապա օրենքի ուժով անձը պետք է գրանցվի պրոբացիոն ծառայությունում, եթե պարտադիր գրանցվում է, ապա նվազագույնը մեկ օր է, եթե այլ ժամկետ կար նշելու՝ մինչև երեք օր, ապա դատարանը դա կնշեր․ «Դա նույնն է, որ խափանման միջոց ընտրես տնային կալանքը, մի հատ էլ գրես, որ տանից դուրս չգա»։

Ավելին, նախագահողը նշեց, որ պրոբացիոն ծառայությունից հենց հաջորդ օրը զանգել են, նշել, որ անձինք եկել են, վերցվել՝ հաշվառման, հետաքրքրվել՝ արդյոք էլեկտրոնային հսկողություն պետք է կիրառվի, ինչին ի պատասխան նախագահողը հայտնել է, որ անհրաժեշտություն չկա, անհրաժեշտության դեպքում դա կնշվեր դատական ակտում։

Հիշեցնենք, որ մարտի 22-ին Նարեկ Սամսոնյանը և Վազգեն Սաղաթելյանը ձերբակալվել, ապա՝ կալանավորվել են իրենց հեղինակային «Իմնեմնիմի» հաղորդաշարում Փաշինյանի հասցեին հնչեցված գնահատականի համար։ Ընդ որում՝ նրանց մեղադրանք է ներկայացվել ՀՀ քրեական օրենսգրքի 297-րդ հոդվածի 2-րդ մասի 1-ին և 3-րդ կետերի հատկանիշներով, այն է՝ խուլիգանությունը, որն իրականացվել է մի խումբ անձանց կողմից՝ տեղեկատվական կամ հաղորդակցական տեխնոլոգիաներն օգտագործելով։ Մասնագիտական հանրությունը այս հետապնդումը քաղաքական է գնահատում՝ նշելով, որ սա քայլ է՝ խոսքի ազատության դեմ։ Ընդ որում, այսպես կոչված, «համացանցային խուլիգանության» հոդվածը, կարելի է ասել, նույնական է «ծանր վիրավորանքի» հոդվածին, որն այս իշխանությունների «նորամուծությունն» էր և հեռացվեց ՝ միջազգային կառույցների ճնշումների ներքո։ Քրեական գործն այժմ Երևանի ընդհանուր իրավասության քրեական դատարանի դատավոր Արման Հովհաննիսյանի վարույթում է։ Նախնական դատալսումների ընթացքում դատարանի որոշմամբ Նարեկ Սամսոնյանի և Վազգեն Սաղաթելյանի նկատմամբ որպես խափանման միջոց է կիրառվել վարչական հսկողությունը։

Հեղինակ՝ Իզաբել Սահակյան

Աղբյուր` Փաստինֆո