Փաստ ինֆո

Արդեն 3-րդ օրն է՝ Նուբարաշենի աղբավայրում հրդեհ է։ Աղբավայրում նման հրդեհները հազվադեպ չեն, և գրեթե ամեն տարի լինում են։

Քաղաքապետի մամլո խոսնակ Հայկ Կոստանյանը «Փաստինֆոյի» հետ զրույցում ասաց, որ աղբավայրի տարածքը տարիներ առաջ վարձակալության է հանձնվել։ «Քաղաքապետարանի գործառույթի տեսանկյունից կարող եմ ասել, որ մեր կոմունալ վարչությունը այս տարի, նախորդ տարի պարբերաբար հողային աշխատանքներ է իրականացնում, որպեսզի ամառային շրջանում աղբի հրդեհների օջախները չլինեն կամ քիչ լինեն։

Հարցին, թե միգուցե ընկերությունը, որին կառավարման է հանձնված աղբավայրը, պատշաճ չի՞ կատարվում պարտականությունները և հարկավոր է բացի հողային աշխատանքներից, այլ լուծումներ գտնել՝ Կոստանյանն ասաց, որ հրդեհից ոչ աղբավայրում, ոչ էլ որևէ այլ վայրում խուսափել հնարավոր չէ։ «Դրա համար էլ կանխարգելիչ աշխատանքներ են կատարվում, որպեսզի հնարավորինս նվազեցնեն՝ դրանից բխող վնասները։

Հիմա մենք մեր մասով ոչ միայն այս օրերին, այլև անցած տարիներին հողային աշխատանքներ ենք անում, ծածկում ենք, որպեսզի հրդեհները հնարավորինս կանխվի»։

Բնապահպան Հակոբ Սանասարյանն էլ անձրադառնալո հողային աշխատանքներին՝ ասաց, որ իրականում հողային շերտով ծածկումը կարող է հենց շատ լավ նպաստել բիոգազի առաջացմանը։ «Այդ դեպքում գազը ոչ թե դուրս է գալիս այլ կուտակվում է ու հրդեհի պատճառ դառնում։ Քաղաքապետարանը գլուխը պատով է տալիս, որ հողային աշխատանքներ է անում, ոչ թե հողային աշխատանքներ է պետք անել, այլ պետք է լուծել աղբի խնդիրը։ ՀՀ բնակչության մեծ մասը կուտակված է Երևանում, ինչ է՞ պետք է խեղդվենք։ Քաղաքապետարանում խնդրին չեն տիրապետում»։

Հարցին, թե հնարավոր է, որ աղբավայրում միտումնավոր հրդեհումներ իրականացվեն, որպեսզի դրանով կուտակված աղբի զանգվածը նվազեցնեն՝ բնապահպանը նշեց, որ չի բացառվում, որ հրդեհները բնական լինեն։ «Երբ աղբը կուտակվում է, սեղմվում է, ձևավորվում է կենսագազ՝ մեթան գազ, որը բաձր ջերմության դեպքում կարող է նաև ինքն իրեն հրդեհվել։

Իհարկե, այդպիսի հրդեհից ազատված ծուխը չափազանց վտանգավոր է, քանի որ տարբեր կարգի տոքսիկ նյութեր է պարունակում։ Ընդ որում՝ վտանգը նաև այն է, աղբավայրի տարածքում խոզեր, կովեր, այծեր ու ոչխարներ են պտտվում, որոնք ուտում են տարածքում թափված աղբը, ու հետո այդ կենդանիների միսը կարող է հայտնվել շուկայում։

Եթե քաղաքապետարանը կամ կառավարման վերցրած ընկերությունը չունեն կարողություններ, ապա պետք է համագործակցեն այլ երկրների հետ, որոնք համապատասխան փորձ ունեն, ունեն աղբի տեսակավորման փորձ նաև, դրանից կարելիէ մեծ օգուտներ քաղել։

Օրինակ, եվրոպական երկրներում մեծ աղբավայրերը, որ կառուցում են՝ խողովակ են դնում՝ 1-2 մետր շառավղող, որպեսզի եթե աղբավայրում բիոգազ առաջանա՝ այն դուրս գալու ճանապարհ ունենա։ Իհակե, սա ծախսեր է պահանջում, բայց այն լիովին արդարացված է, քանի որ դրանից նաև եկամուտ կարելի է ստանալ։

Թեև, կարծում եմ, մեր այս զրույցն էլ անօգուտ է, եթե երկիր կառավարիչը չի կարողանում այն կառավարել ու մաս-մաս հանձնում է թշնամուն՝ աղբավայրի կառավարիչից կամ քաղաքապետարանից ի՞նչ կարելի է ակնկալել»,-ասաց Սանասարյանը։

Աղբյուր` Փաստինֆո