Փաստ ինֆո

Oգոստոսի 11-ին ավարտվել է Փարիզի ամառային Օլիմպիական Խաղերը։ Հայաստանի Օլիմպիական հավաքականը մեդալներ նվաճած 91 հավաքականների թվում 66-րդն էё 3 արծաթե և 1 բրոնզե մեդալով։ Օլիմպիական խաղերի պատկերը տարածաշրջանի երկրների համար հետևյալ տեսքն ունի՝ 21-րդ տեղում Իրանն է, 24-րդ տեղում՝ Վրաստանը, 30-րդ տեղում՝ Ադրբեջանը, 64-րդ տեղում՝ Թուրքիան, 66-րդ տեղում ՝ Հայաստանը։

Ընդհանուր հաշվարկում հաղթել է ԱՄՆ-ի հավաքականը՝ նվաճելով 126 մեդալ։ Ամերիկացիներն ունեն 40 ոսկե, 44 արծաթե և 42 բրոնզե մրցանակ։ Երկրորդ տեղում է Չինաստանի հավաքականը 94 մեդալով՝ 40 ոսկե, 27 արծաթե և 24 բրոնզե։ Երրորդ տեղը զբաղեցրել է Ճապոնիայի հավաքականը, որը նվաճել է 45 մեդալ, այդ թվում՝ 20 ոսկե, 12 արծաթե և 13 բրոնզե մրցանակ։

Օլիմպիական այս խաղերը, սակայն, հիշարժան էին նաև զավեշտալի և սկանդալային դրվագներով, որոնցից մի քանիսը «Փաստինֆո»-ն կներկայացնի ամփոփ։ Թերևս, ամենասկանդալային դրվագը կապված է ալժիրցի բռնցքամարտիկ Իման Խելիֆի հետ, որը նախկինում ձախողել էր գենդերային թեստը և այս անգամ ևս հայտնվել ուշադրության կենտրոնում։ Նրա հակառակորդ իտալացի 26-ամյա մարզուհին կասկածի տակ էր դրել ալժիրցի մարզուհու սեռը՝ նշելով, թե մարտն անարդար է, ինչն էլ քննարկումների առիթ է դարձել, շատերը պնդում էին, թե Իման Խելիֆը տղամարդ է կամ սեռափոխված անձ, ալժիրուհու հայրն էլ սոցիալական ցանցերում հրապարակել է Իմանի մանկության լուսանկարները, որտեղ պատկերված է աղջիկ երեխա, Իման Խելիֆն ինքը նշել է, թե երբևէ տղամարդ չի եղել։ Սկանդալի կենտրոնում հայտնված ալժիրցի մարզուհին ոսկե մեդալ է նվաճել։

Զավեշտալի իրավիճակում է հայտնվել նաև Ֆրանսիան ներկայացնող ձողացատկորդ Էնթոնի Ամիրաթթին, որը, թեև այս Օլիմպիական Խաղերում հաջողություն չի նվաճել սպորտաձևում, սակայն հայտնվել է հանրային ուշադրության և, ըստ մամուլի, նաև՝ մեծերի համար նախատեսված կայքերի ուշադրության կենտրոնում՝ ստանալով 250 հազար դոլարի առաջարկ։ Հենացատկորդը չի կարողացել հաղթահարել թռիչքի 5,70 մ․ բարձրությունը՝ ծնկով, ապա՝ ինտիմ օրգանով խաչաձողին դիպելու պատճառով։

Ֆրանսիան ներկայացնող վազորդուհի Ալիս Ֆինոն էլ ուշադրության կենտրոնում է հայտնվել՝ մարաթոնից հետո ամուսնության առաջարկություն անելով իր ընկերոջը, ում հետ հանդիպում է 9 տարի; Մազորդուհին, թեև մեդալ չի նվաճել՝ ֆինիշին հասնելով չորրորդը, սակայն սահմանել է եվրոպական ռեկորդ։

Սոցիալական ցանցերում օգտատերերի ուշադրության կենտրոնում է հայտնվել արծաթե մեդալ նվաճած չինացի 18-ամյա մարմնամարզուհի Չժոու Յացզին, որին օգտատերերը համակրել են։ Մեդալը ստանալուց հետո մարմնամարզուհին տեսել է, թե ինչպես են Իտալիան ներկայացնող ոսկե և բրոնզե մեդալներ նվաճած մարմնամարզուհիները «կծում» մեդալները, ապա՝ կրկնել ժեստը՝ կարծելով, թե դա պարտադիր է։

Դիտորդները հիացած են եղել նաև Հյուսիսային և Հարավային Կորեաների ներկայացուցիչների համատեղ սելֆիից՝ թենիսի մրցույթում մեդալների բաշխման արարողությունից հետո։ Սոցիալական ցանցերում օգտատերերի մի մասը հիացած է այս ժեստով, մյուս մասը՝ մեկնաբանություններում «մտահոգություն» է հայտնում Հյուսիսային Կորեայի մարզիկների ճակատագրի առնչությամբ։

Եգիպտացի սուսերամարտիկ Նադա Խաֆեզը նույնպես արժանացել է օգտատերերի համակրանքին, քանի որ մրցումներին մասնակցել է հղիության 7-րդ ամսում։ Համացանցում հայտնիություն է ձեռք բերել նաև Թուրքիան ներկայացնող հրաձիգ Յուսուֆ Դիկեչը, որը մասնակցել է մրցմանը՝ սովորական օպտիկական ակնոցներով և ձեռքը՝ գրպանում։ Դիկեչը համացանցում դարձել է «մեմերի» առարկա, օգտատերերը նրան համեմատում էին մարտաֆիլմերի հերոսների, նախկին «քիլլերի» հետ։ Ընդ որում, 51-ամյա Դիկեչն ինքը «զարմացած» էր իր այս հայտնիությունից։ Մարզին օլիմպիադաներին մասնակցել է դեռևս 2008թ․-ից, նվաճել մի շարք մեդալներ, սակայն նման ուշադրության արժանացել է միայն վերջին Օլիմպիադայի ժամանակ։

Օլիմպիական այս խաղերը ուշադրության կենտրոնում է հայտնվել նաև կազմակերպչական հարցերի պատճառով։ Բացի այն, որ խաղերի բացման արարողությունն ինքնին տարատեսակ մեկնաբանությունների տեղիք էր տվել, մարզիկները դժգոհ են եղել նաև պայմաններից։ Սենա գետում մարզվող լողորդների մի մասը գետի աղտոտվածության պատճառով աղիքային ինֆեկցիայով են վարակվել, իսկ համարներում օդորակչի բացակայության և ստվարաթղթից պատրաստված էկո-մահճակալները անհարմարություն են առաջացրել մարզիկներին, ինչի հետևանքով իտալացի 23-ամյա լողորդ Թոմաս Չիկկոնն ստիպված է եղել քնել այգում, իսկ վրացի գերծանր քաշային ծանրորդ Լաշա Տալախաձեի համար ստիպված են եղել միացնել երկու մահճակալ, քանի որ այն չափից փոքր էր։

Տեսանյութերըը՝ «Փաստինֆո»-ի տելեգրամի ալիքում։

Աղբյուր` Փաստինֆո