Փաստ ինֆո

Արթուր Ալեքսանյանի եզրափակիչ գոտեմարտի հետ կապված ՀԱՕԿ-ը բողոք է ներկայացրել Միջազգային օլիմպիական կոմիտեի բողոքարկման հանձնաժողովին: Այս մասին լրագրողներին ասել է ՀՀ ԿԳՄՍ նախարարի տեղակալ Կարեն Գիլոյանը:

Նշենք, որ մինչ այդ ըմբշամարտի միջազգային ֆեդերացիան գրավոր պնդել է, թե մրցավարները ճիշտ որոշում են կայացրել: ՀԱՕԿ–ը, ըստ Գիլոյանի, կցելով Հայաստանի ըմբշամարտի ֆեդերացիայի բողոքարկումը և Ըմբշամարտի Միջազգային ֆեդերացիայի պատասխանը, դիմել է միջազգային օլիմպիական կոմիտեի բողոքարկման հանձնաժողովին:

«Մենք Օլիմպիական խաղերի ընթացքում ունեցանք դեպքեր, երբ այլ գոտեմարտում նմանատիպ դրվագի համար ճիշտ հակառակ վերաբերմունքն է եղել: Մենք մեր ոսկե մեդալը պահանջելու ենք մինչև վերջին ատյան, մինչև Լոզան»,-ասաց նա։

Կազմակերպչական առումով Փարիզի խաղերը, նախկին մարզական մեկնաբան, ներկայումս փոխնախարար Գիլոյանի կարծիքով, լավագույններից էին: Փարիզը կարողացավ սիրով ընդունել օլիմպիականներին, և վստահ է, որ շատերի համար այս խաղերը կմնան որպես լավագույն հիշողություն: Հուլիսի 26–ին մեկնարկած Փարիզի 33–րդ ամառային օլիմպիական խաղերի մասնակից 84 երկրների ցանկի առաջին հորիզոնականում ԱՄՆ–ն է, որը նվաճեց 126 մեդալ (40 ոսկի, 44 արծաթ, 42 բրոնզ), երկրորդ տեղում Չինաստանն է (91 մեդալ` 40 ոսկի, 27 արծաթ, 24 բրոնզ), երրորդում` Ճապոնիան (45 մեդալ` 20 ոսկի, 12 արծաթ, 13 բրոնզ)։Հայաստանի 15 ներկայացուցիչներից մեդալների արժանացան 4–ը՝ մարմնամարզիկ Արթուր Դավթյանը (արծաթ), հունահռոմեական ոճի ըմբիշ Արթուր Ալեքսանյանը (արծաթ), ծանրորդ Վարազդատ Լալայանը (արծաթ), հունահռոմեական ոճի ըմբիշ Մալխաս Ամոյանը (բրոնզ)։

Աղբյուր` Փաստինֆո