Փաստ ինֆո

Դատական համակարգը պարալիզացվել է։ Ստեղծվել է իրավիճակ, երբ բարձրագույն մակարդակում՝ վճռաբեկ և սահմանադրական արդարադատություններն ամբողջությամբ քաղաքականացվել են։ Այս մասին հրավիրված մամուլի ասուլիսում ասել է փաստաբան Ալեքսանդր Կոչուբաևը։

«Դեռևս 2020թ․ Վչռաբեկ դատարանը Բնապահպանության տեսչական մարմնի պետ Իգոր Սարգսյանին աշխատանքից ազատելու հարցը քննարկելիս՝ հստակ արձանագրեց՝ ղեկավարվելով ՍԴ որոշումներով՝ ձևավորեց նախադեպային իրավունք առ այն, որ ի թիվս այլնի հանրային ծառայության շրջանակներում կիրառելի են նաև աշխատանքային օրենսգրքի նորմերը»,- մանրամասնեց Կոչուբաևը՝ պարզաբանելով, որ անձին պաշտոնից ազատելիս պետք է կիրառվեր Աշխատանքային օրենսգրքով նախատեսված որևէ հիմք, դա արդեն կայուն ձևավորված պրակտիկա էր, մինչդեռ, վերջերս Վահագն Վերմիշյանի գործով վերաքննիչ դատարանը բավարարել է բողոքը՝ արձանագրելով, որ Վերմիշյանին պաշտոնից ազատելն ապօրինի է, սակայն Վճռաբեկ դատարանը վարույթ է ընդունել այդ դատական ակտի դեմ բողոքը և դիմել ՍԴ։

«ՍԴ-ն տվեց հակաիրավական, հակագիտական, ոչ իրավաչափ որոշում առ այն, որ Աշխատանքային օրենսգրքի նորմերը կիրառելի չեն հանրային ծառայողների վարչական պաշտոն զբաղեցնող անձանց համար, ինչը նշանակում է, որ հանրային ծառայությունում վարչական պաշտոն զբաղեցնող մարդը կարող է ցանկացած պարագայում կամայականորեն զրկվել պաշտոնից»,- ասաց Կոչուբաևը։

Փաստաբանը համոզմունք ունի առ այն, որ կարևոր դերակատարություն ունի նաև ՍԴ դատավոր Վահե Գրիգորյանը, որը ՄԻԵԴ դատավորի թեկնածուներից մեկն է և այս քայլով Վահե Գրիգորյանը ցանկացել է կառավարությանը ցույց տալ, որ ինքը ՍԴ-ում կարողանում է այսպիսի ծառայություններ մատուցել, ապա հետագայում՝ ՄԻԵԴ-ում կշարունակի նույնկերպ հօգուտ ՀՀ կառավարության՝ գործունեություն ծավալել նաև ՄԻԵԴ-ում։

«Հույս ունեմ՝ այս խոսքը նաև ՄԻԵԴ կհասնի և ընտրության ժամանակ խորքային կմտածեն, թե արդյոք Վահե Գրիգորյանը քաղաքական ֆիգուր չէ և ներկայումս, գնալով ԵԴ, չի զբաղվելու քաղաքականությամբ։ Խոսելով Վահե Գրիգորյանի մասին՝ չեմ կարող չխոսել նաև «Մարտի 1»-ի գործով ՍԴ-ում նրա մասնակցության մասին, մինչդեռ, առաջին կուրսի ուսանողը գիտի, որ եթե անձը դատական քննության որևէ փուլում որևէ կարգավիճակում մասնակցել է քննությանը, ապա ՍԴ-ում կամ վերադաս դատական ատյանում չի կարող մասնակցել գործի քննությանը։ Վահե Գրիգորյանը «Մարտի 1»-ի գործով տուժողների շահերի ներկայացուցիչն էր, ՍԴ-ում Գրիգորյանը պետք է ինքնաբացարկ հայտներ, բայց ոչ միայն մասնակցեց, այլև՝ կողմ քվեարկեց։ Վահե Գրիգորյանը զբաղվում է քաղաքականությամբ, գնալով ՄԻԵԴ՝ շարունակելու է զբաղվել քաղաքականությամբ։ Նա ինչպես չէր բավարարում ՍԴ դատավոր ընտրվելու ստանդարտներին, այնպես էլ՝ չի բավարարում ՄԻԵԴ դատավորի ստանդարտին»,- ասաց փաստաբանը։

Աղբյուր` Փաստինֆո