Փաստ ինֆո

Երևանի ընդհանուր իրավասության քրեական դատարանում՝ դատավոր Կարեն Ֆարխոյանի նախագահությամբ, այսօր կայացել է ՀՅԴ անդամներ Գերասիմ Վարդանյանի, Բագրատ Եսայանի և Գառնիկ Մելքումյանի գործով դատական նիստը։

Հիշեցնենք, որ քրեական գործը վերաբերում է 2020թ նոյեմբերի 9-ին կապիտուլյացիոն ակտի ստորագրմանը հաջորդած ակցիաներին, մասնավորապես՝ «Ազատություն» ՌԿ շենք մուտք գործելու դրվագին։ Գերասիմ Վարդանյանը, Բագրատ Եսայանը, Գառնիկ Մելքումյանը մեղադրվում են 2020 թվականի նոյեմբերի 10-ին Երևան քաղաքում տեղի ունեցած զանգվածային անկարգությունների ժամանակ խոչընդոտները վերացնելու եղանակով զանգվածային անկարգություններին օժանդակելու, ինչպես նաև խմբի կազմում լրագրողի մասնագիտական օրինական գործունեությանը խոչընդոտելու մեջ: Նշենք, որ այս գործի շրջանակներում Գերասիմ Վարդանյանը տևական ժամանակ կալանքի տակ է եղել, ապա՝ գրավի դիմաց ազատ արձակվել։ Այժմ Վարդանյանը կալանքի տակ է մեկ այլ քրեական գործով։

Գործը գտնվում է հիմնական դատալսումների՝ վկաների հարցաքննության փուլում։ Դատական նիստի մեկնարկին նախագահողը հայտնեց՝ գործը դռնփակ քննելու վերաբերյալ, կարճ ժամանակ անց, սակայն, գործի քննությունը շարունակվեց դռնբացության պայմաններում։ Հարցաքննվեց գործով անցնող վկաներից մեկը։ Փաստաբան Սերգեյ Հարությունյանը լրագրողների հետ զրույցում ասաց, որ դատավարությունն արդեն չորրորդ տարին է, որ շարունակվում է, հերթական վկայի հարցաքննություն է, որևէ զարմանալի բան չկա, սակայն այսպիսի գործերի առկայությունը նպաստել է, որ անձանց նկատմամբ խափանման միջոց ընտրվի։

«Գերասիմ Վարդանյանը նախկինում յոթ ամիս անազատության մեջ էր գտնվում, այժմ ՝ ևս անազատության մեջ է, բայց ցավալին այն է, որ «Ազատություն» ռկ վերաբերյալ գործն առիթ է, որ անձինք լինեն անազատության մեջ։ Զարմանալի է, երբ 50-ականներին ստեղծվում էր «Ազատություն» -ն, արդյո՞ք գիտեին, որ շատ քաղբանտարկյալների համար կռիվ տված հեռուստաընկերությունն ինքը կլինի առիթ, որ մարդիկ լինեն անազատության մեջ»,- ասաց Հարությունյանը։

Հեղինակ՝ Իզաբել Սահակյան

Աղբյուր` Փաստինֆո