Փաստ ինֆո

Եթե ընդդիմությունը կամ Սրբազան պայքարի առաջնորդը նպատակ ունեն սեպտեմբերին փողոցով գալ իշխանության, ապա դա չի հաջողվելու։ Այս մասին «Փաստինֆոյի» հետ զրույցում ասաց քաղտեխնոլոգ Արմեն Բադալյանն՝ անդրադառնալով Բագրատ արքեպիսկոպոս Գալստանյանի հայտարարությանը, թե սեպտեմբերի 10-ից «թեժ աշուն է սկսվելու»։

Քաղտեխնոլոգն ասաց, որ իր տպավորությամբ ընդդիմությունը նորից փորձելու է միտինգներ ու ակցիաներ անել։ Մի բան, որ 30 տարի արել են իրենցից առաջ եղած բոլոր ընդդիմությունները։ «1991-92 թթ-ից Հայաստանի բոլոր ընդդիմադիրները միտինգ են արել ու հիմա էլի նույնն են անելու։ Եթե 30 տարի չի հաջողել, ինչո՞ւ պետք է 31-րդ տարում հաջողի։

Խնդիրը ո՞րն է՝ մարդկանց բերել հանրահավաքի՞, մարդիկ մայիսի 9-ին եկան հանրահավաքի, դրանից առաջ էլ էին եկել հանրահավաքի՝«Դիմադրություն» շարժման ժամանակ, «ՀՓՇ»-ի ժամանակ, դրանից առաջ՝ նախորդ իշխանությունների օրոք էին եկել հանրահավաքների։ Հանրահավաքի գալով հարց չի լուծվում։ Այսինքն, սեպտեմբերին հանրապետության հրապարակը նորից 30-40 հազար մարդ հավաքվեց, հետո՞։

Ամեն բան կախված է նրանից, թե ինչ նպատակ ու խնդիր է դրվելու, ինքնանպատակ չի մարդկանց համախմբելն ու 30-40 հազար մարդ բերելը»։
Քաղտեխնոլոգի դիտարկմամբ՝ դրա համար էլ սեպտեմբերին 30 000, թե 40 000 մարդ դուրս կգա փողոց՝ ոչինչ չի նշանակի։ «Ի՞նչ են անելու, էլի փողո՞ց են փակելու, թող փակեն՝ կարմիր բերետավորներն էլ կգան, կծեծեն, կբացեն։

Պայքարի բացարձակ այլ մեթոդ է պետք գտնել, որովհետև պայքարի այս մեթոդը չի աշխատում, 30 տարի նույն բանն անում են ու անընդհատ պարտվում են։

Եթե մարդկանց աչքի առաջ 2018 թ-նն է, ապա հիասթափեցնեմ՝ 2018-ին Նիկոլը փողոցով չի իշխանության եկել, այլ արևմուտքի պահանջով իշխանությունը հանձնվեց ընդդիմությանը։

Այն ժամանակվա ղեկավարը հեռացավ, որովհետև արևմուտքը պահանջեց ու իշխանության եկավ Փաշինյանը։ Դա պայմանավորված իշխանափոխություն էր՝ երաշխիքով, որ իշխանություն հանձնած որևէ մարդ չի հայտնվի բանտում, ինչը և եղավ։ Երբ 5 հոգով Ֆրանսիական հրապակ են փակում և կողքին կանգնած ոստիկանները որևէ քայլ չեն ձեռնարկում հրապարակը բացելու՝ դա նշանակում է, որ վերևից հրահանգ կա՝ ոչինչ չանելու։ Իսկ երբ հրահանգ է լինում ինչ-որ բան անելու՝ տեսնում եք, որ կարմիր բերետավորները շատ լավ անում են։

2018-ին կարմիր բերետավորներ չկայի՞ն, կային, կարծում եք հանկարծ սխալվեցին ու չհաշվարկեցի՞ն։ Կարո՞ղ էին նույն կարմիր բերետավորները ռադիոտունը գրաված բոլոր մարդկանց հավաքել ու տանել՝ հենց նույն տեղից, հետո էլ քրեական գործեր հարուցել, կարող էին, ինչո՞ւ չարեցին, որովհետև վերևից հրանհանգ կար։ Պետք է իշխանությունը փոխվեր որ ժողովուրդը հավատար, որ կարող են փողոց փակելով իշխանություն փոխել։
Հետո այդ իշխանությունը ինչ աներ՝ ասելու էր ժողովրդի պահանջն է, երբ Ղարաբաղը հանձնեց՝ ժողովուրդն ասեց, մեր բերած իշխանությունը Ղարաբաղն հանձնեց։ Սրա համար էր պետք է2018 թ-ը, որ ժողովուրդն հավատար, որ ինքն իշխանություն է փոխել։

Բայց հիմա նման բան չի լինի, քանի որ Արևմուտքն իր նպատակին հասել է։

Այսինքն, երբեք փողոցով իշխանափոխություն չի եղել ու չի լինի, իշխանափոխության համար պետք է արտաքին քաղաքական աջակցություն, մասնավորապես՝ արևմուտքի՝ նկատի ունեմ ԱՄՆ-ի, կամ Իրանի աջակցությունը։
Հիմա միայն այդ երկու երկրները կարող են Հայաստանում իշխանափոխություն անել, առանց այդ երկու երկրների համաձայնության՝ Հայաստանում իշխանափոխություն չի լինելու»։

Աղբյուր` Փաստինֆո