Փաստ ինֆո

Դա միայն Վանո Սիրադեղյանի ծրագիրը չէր, որոշումն ընդունվել է քաղաքական կարգով, ուղղակի Արմեն Տեր-Սահակյանը շփվել է Վանոյի հետ: Այդ բանդան մինչև 1998թ. Վնասազերծվելը գործել է անխափան և հանդուգն ձևով: Այս մասին լրագրողների հետ զրույցում ասաց բանդայի կողմից 1992թ. սպանված Աշտարակի շրջխորհրդի գործկոմի նախագահ Հովհաննես Սուքիասյանի որդին` Թադևոս Սուքիասյանը: Նրա դիտարկմամբ` քաղաքական սպանությունները կազմակերպվել են ՀՀՇ քաղաքական իշխանության կողմից, քաղաքական տեռոր էր, ինչը երևում է նաև Արմեն Տեր-Սահակյանի ցուցմունքներում: Անդրադառնալով բանդայի ղեկավարի պնդումներին, թե 1992թ. արցախյան ճակատում պարտություններ ենք կրել և որ իբրև իր հայրն է դրա մեղավորը` Սուքիասյանը հիշեցրեց` ազատամարտի ժամանակ իրենց ուրույն տեղն է ունեցել դաշնակցական ջոկատները, իսկ իր հայրը այդ տարիներին եղել է դաշնակցության ոչ շարքային անդամ, իր անձնական միջոցներով բազմահազար գաղթականություն էր պահում, 400 որբ էր պահում:

Սուքիասյանը հիշեց հոր խոսքերը, որ 400 երեխայի հարց ունի լուծելու, իր երեխաները կարող են նախորդ տարվա կոշիկը հագնել, միևնույն ժամանակ, հիշեց ՀՀՇ պաշտոնավարման ժամանակ երկրում տիրող իրավիճակը:

Թադևոս Սուքիասյանն ընդգծում է` Արմեն Տեր-Սահակյանը վախենում է, քանի որ շատ լավ գիտի, որ իր հոր սպանությունը ոսկոր է, որը կմնա կանգնած նրա և շատերի կոկորդին: Ինչ վերաբերում է Տեր-Սահակյանի պնդումներին, թե իբրև Վանո Սիրադեղյանի դեմ ցուցմունք չի տվել, ապա Սուքիասյանը պատրաստակամ է ցույց տալ ցուցմունքները, Տեր-Սահակյանը` սոխակի պես է երգել:

Աղբյուր` Փաստինֆո