Փաստ ինֆո

ՀՀ կառավարությունը հիմնում է «Ատոմային նոր էներգաբլոկի կառուցում» փակ բաժնետիրական ընկերություն, ընկերություն՝ նոր ատոմային էներգաբլոկի (էներգաբլոկների) կառուցման ծրագրի կառավարման նպատակով: Համապատասխան որոշման նախագիծը ներառված է կառավարության այսօրվա նիստի օրակարգում։

ՀՀ կառավարության 2021թ. հունվարի որոշմամբ հաստատված Հայաստանի Հանրապետության էներգետիկայի բնագավառի զարգացման ռազմավարական ծրագրի (մինչև 2040 թվականը) իրագործումն ապահովող ծրագիր-ժամանակացույցի համաձայն՝ նախատեսված է ՀԱԷԿ-ի երկրորդ էներգաբլոկի շահագործման ժամկետի ավարտից հետո գործող կայանի հարթակում փոխարինող հզորության Էներգաբլոկի կառուցում՝ տնտեսական նպատակահարմարության դեպքում դիտարկելով նաև փոքր մոդուլյար ռեակտորներ:
Որոշման հիմնավորման համաձայն՝ կազմակերպության կազմակերպական-իրավական ձևը և կադրերի հավաքագրումը պետք է համապատասխանի ԱԷՄԳ-ի ընթացակարգերին, ֆինանսավորումը պետք է իրականացվի ՀՀ պետական բյուջեի միջոցների հաշվին, իսկ ընկերության ընդհանուր կառավարումը պետք է իրականացվի լիազոր մարմնի, այն է՝ ՀՀ տարածքային կառավարման և ենթակառուցվածքների նախարարության կողմից:
Վերոնշյալ կազմակերպությունը պետք է համեմատական ուսումնասիրություն անցկացնի բոլոր առաջարկվող տեխնոլոգիաների և տեխնիկատնտեսական հիմնավորումների միջև, որի հիման վրա կներկայացնի տեխնոլոգիայի ընտրության վերաբերյալ իր մասնագիտական առաջարկը, ինչը պետք է լինի բազմակողմանի հիմնավորված փաստաթուղթ։
Վերջինս ՀՀ կառավարության կողմից հավանության արժանանալուց հետո կազմակերպությունը պետք է բանակցի և նախապատրաստի նոր միջուկային էներգաբլոկի կառուցման, ֆինանսավորման, տիրապետման և շահագործման հետ կապված փաստաթղթերը:

Ազգային ժողովի կողմից նոր միջուկային էներգաբլոկի կառուցման մասին օրենքը սահմանված կարգով ուժի մեջ մտնելուց հետո, կառավարության կողմից ընդունած ժամանակացույցին համապատասխան կազմակերպությունը պետք է կառավարի, կազմակերպի և պատասխանատու լինի նոր միջուկային էներգաբլոկի կառուցման համար, այսինքն՝ հանդիսանա տվյալ ծրագրին իրականացնողը:

Տեխնոլոգիայի ընտրության և կայանի կառուցման նախապատրաստական փուլում կազմակերպությանը մոտավոր գնահատմամբ անհրաժեշտ կլինի շուրջ 800 միլիոն դրամ տարեկան բյուջե։

Հաշվի առնելով ԱԷՄԳ-ի ուղեցույցը՝ նմանատիպ ծրագրի իրականացման համար անհրաժեշտ է տարբեր ոլորտների (էլեկտրաէներգետիկա, միջուկային ֆիզիկա, բնապահպանություն, կրթություն, քաղաքաշինություն և այլն) բարձր որակավորում ունեցող 50-60 մասնագետներով համալրված անձնակազմ:

Հաշվի առնելով աշխարհում միջուկային տեխնոլոգիաների զարգացման փուլը և աշխարհաքաղաքական զարգացումները՝ կարծում ենք, որ տվյալ կազմակերպության ստեղծումից և համապատասխան անձնակազմի համալրումից հետո 1,5-2 տարվա ընթացքում կկարողանա կառավարությանը տալ հիմնավորված առաջարկ տեխնոլոգիայի ընտրության վերաբերյալ:
Ըստ նախնական գնահատականի 2024թ. համար Ատոմային նոր էներգաբլոկի կառուցման ծրագրի բյուջեն կկազմի 200 մլն դրամ։

Աղբյուր` Փաստինֆո