Փաստ ինֆո

Մ․ Փեզեշքիանի ընտրությունից հետո և, անգամ քարոզարշավի ընթացքում, շատ էր խոսվում Իրանի քաղաքական գծի հնարավոր փոփոխությունների մասին, ինչպես նաև խոսվում էր Մ․ Փեզեշքիանի ազգային պատկանելիության մասին, որ հնարավոր է նաև պրոհայկական կամ պրոթուրքական դիրքորոշում որդեգրի։ «ՓաստԻնֆոյի» եթերում ասել է իրանագետ, ԵՊՀ Իրանագիտության ամբիոնի դասախոս Գարիկ Միսակյանը։

Բանախոսի դիտարկմամբ, Իրանի պարագայում ազգային պատկանելիությունը որևէ խնդիր չի լուծում։ Նույն հոգևոր առաջնորդը, լինելով ատրպատականյան թյուրքախոսների հատվածից, բավականին հակաթուրքական քաղաքականություն է վարում։ Հոգևոր առաջնորդի հայտարարությունը ևս մեկ անգամ ցուցիչ էր, որ Իրանում նախագահը հանդիսանում է հոգևոր առաջնորդի հրամաններն իրականացնող գործիք։ Այս պարագայում բավականին բացահայտ նշվեց, որ Մ․ Փեզեշքիանը հարևանների հետ հարաբերությունների ենթատեքստում շարունակելու է Է․ Ռաիսիի քաղաքականությունը, այն է՝ հարևանների հետ հարաբերությունների կարգավորման գիծը։

Անդրադառնալով Ա․ Խամենեիի և Ն․ Փաշինյանի հանդիպմանը, իրանագետը նշեց, որ հոգևոր առաջնորդի հայտարարությունը մի քանի ուղերձ էր պարունակում։ Նախ, որ նախագահի փոփոխությամբ որևէ փոփոխություն Իրանի արտաքին քաղաքականության ոլորտում, համենայն դեպս, Հայաստանի նկատմամբ չի լինելու և Իրանը իր անվտանգային շահերից ելնելով նույն բովանդակությամբ հայտարարությունը կրկնեց ամենաբարձր մակարդակով։ Սա նշանակում է, որ Իրանում մտահոգություն կա «Զանգեզուրի միջանցք»-ի վերաբերյալ։ Դատելով ԱՄՆ հայտարարությունից ևս, «Զանգեզուրի միջանցք»-ի թիկունքում արևմտյան ուժերն են կանգնած։ Իրանում մտավախության կա, որ Հայաստանը, այնուամենայնիվ, տեղի է տալու «Զանգեզուրի միջանցք»-ի հետ կապված։

Ըստ փորձագետի, շահերի բախման թատերաբեմում Հայաստանի չկողմնորոշված քաղաքականությունն է, երբ հայտարարությունների մակարդակում մի բան է, իրականության մակարդակում՝ այլ բան, որը բավական լուրջ խնդիրների կարող է հանգեցնել Հայաստանի համար։ Հոգևոր առաջնորդի հայտարարությունը նաև բավականին լուրջ զգուշացում էր հայկական կողմին, որ, եթե նույնիսկ որևէ խնդիր կա «Զանգեզուրի միջանցք»-ի կամ դրա հաստատման հետ կապված և Հայաստանը ստիպված պետք է լինի որևէ գործողությունների գնալ, ապա դա պետք է համաձայնեցվի Իրանի հետ։

Անդրադառնալով Ադրբեջանը, ԱՄՆ-ի կողմից Իրանի դեմ պլացդարմ օգտագործելու հնարավորությանը՝ Գ․ Միսակյանը նշեց.- «չեմ կարծում, որ Ադրբեջանը շահի, եթե որպես պլացդարմ օգտագործվի Իրանի դեմ, որովհետև Իրանի քայլերն էլ են ուղղված լինելու Ադրբեջանական Հանրապետության դեմ»։

Մանրամասները՝ տեսանյութում։

Աղբյուր` Փաստինֆո