Փաստ ինֆո

Այս պահի դրությամբ` ունենք շուրջ 210 գերի, որոնք հայրենադարձվել են, եւս 23 հայ շարունակում են պահվել Ադրբեջանում։ Այս թվերն այսօր հրապարակել է իրավապաշտպան Սիրանուշ Սահակյանը՝ ավելացնելով, որ նրանց պարագայում խուսափում է գերի տերմինն օգտագործելուց, որովհետև պետք է հասկանանք նաև իրավական ռեժիմները։

Նշված 23-ից 5-ը գերեվարվել են դեռեւս 2020թ. պատերազմի ընթացքում, 2 քաղաքացիական անձ առեւանգվել, ձերբակալվել է մոլորվելու արդյունքում։ Ընդ որում՝ մեկ անձ առեւանգվել է, երբ շրջափակված Արցախից Կարմիր խաչի ուղեկցությամբ տեղափոխվելիս է եղել Հայաստան՝ առողջական նպատակներով։ Մյուս դեպքերը կապված են 2023 թ. հարձակման հետ՝ 8-ը գտնվել են այն բնակավայրերում, որտեղ եղել են մարտական գործողություններ, իսկ մյուս 8 հոգին Արցախի նախկին ղեկավարության անդամներն են, որոնք, ըստ իրավապաշտպանի, ո՛չ գերի են, ոչ ռազմագերի, որովհետև նրանց ազատությունից զրկելը որևէ ուղղակի, անգամ անուղղակի առնչություն չունի մարտական գործողությունների հետ, նրանք քաղաքական պատվերի հիման վրա ձերբակալված եւ այս պահին էլ ապօրինի պահվող անձինք են, ովքեր պատժվում են իրենց արտահայտած կարծիքների, գործունեության , Արցախի ինքնորոշման իրավունքի կայացման, ներդրման համար։

«Նրանց ապօրինի ազատության մեջ պահելը ունի սիմվոլիկ նշանակություն, ուժի գործադրմամբ Արցախի ինքնորոշման իրավունքը խեղդված է ու նաև այդ իրավունքի համար ներդրում արած մարդկանց ազատության իրավունքից զրկելով, այդ ազատության իրավունքն է ազատազրկվում՝ անորոշ ժամանակով։Եվ հասկանալի է, որ այն ձևով, որ նրանք ձերբակալվել են ու ապագայում նաև կանգնելու են դատարանի առջև, ազգային արժանապատվությունը ստորացնող տարրեր ունի իր մեջ»,- ասաց իրավապաշտպանը։

Աղբյուր` Փաստինֆո