Փաստ ինֆո

Ինձ հայտնի էներգետիկները, որոնք բավական լուրջ փորձ ունեն միջուկային էներգետիկայի բնագավառում, ներգրավված չեն նորաստեղծ ընկերությունում, ինչն արդեն բավական մտահոգիչ է, քանի որ ՀՀ-ում շատ չեն միջուկային էներգետիկայի մասնագետները։ Այս մասին «Փաստինֆոյի» հետ զրույցում ասաց տնտեսագետ Թաթուլ Մանասերյանը։ Ինչպես արդեն հայտնել ենք՝ կառավարության այսօրվա որոշմամբ ստեղծվել է «Ատոմային նոր էներգաբլոկի կառուցում» ՓԲԸ-ին, որը հիմնվում է նոր ատոմային էներգաբլոկի (էներգաբլոկների) կառուցման ծրագրի կառավարման նպատակով: Ընկերությունը նաև ուսումնասիրելու է, թե Հայաստանի համար առաջարկվող, որ տարբերակն է նպատակահարմար։

«Եթե այդպես դիլետանտությամբ, կամ «թե որ կողմից քամին կփչի՝ այդ կողմի հետ փորձենք գործարքներ անել» տրամաբանությամբ են առաջնորդվելու, ապա, կարծում եմ, դա շատ վտանգավոր նախապադեպ կլինի»,- նշեց տնտեսագետը։

Մանասերյանը հիշեցրեց, որ սրանից 18 տարի առաջ միջուկային էներգետիկայի մասին օրենքում փոփոխություններ են կատարվել, որպեսզի դաշտը համապատասխանեցվի, ինչպես նաև էներգաբլոկի կառուցման համար ներդրումներ ներգրավելու հնարավորություն լինի։ Մինչդեռ, ընկերությանը 200 մլն դրամ փոխանցումը, տնտեսագետի կարծիքով, այն գումարը չէ, որ ոգևորիչ լինի, քանի որ այս դեպքում միլիարդավոր դոլարների մասին է խոսքը։

«Իրականում բավական լուրջ խնդիրներ կան։ «Ռոսատոմի» -ի հետ փաստաթղթավորված պայմանավորվածություններ կան գործող էներգաբլոկի շահագործման ժամկետը երկարաձգելու առումով, սակայն այստեղ մտավախություններ կան, որ ռուսական կողմը չի մասնակցի հետագա գործընթացներին։ Ուզում եմ հիշեցնել որ ՌԴ-ի հետ համագործակցությամբ այսօր մի քանի ատոմակայաններ են կառուցվում Թուրքիայում, մինչդեռ այն մոդուլային կայանները, որոնք ԱՄՆ-ն առաջարկում է՝ չեն կարող փոխարինել այն կշռին, որ այսօր Մեծամորի ՀԱԷԿ-ն ունի։

Ներկայումս մեր էլեկտրաէներգիայի արտադրության մեջ մոտ 42 տոկոս է ՀԱԷԿ-ի տեսակարար կշիռը, առանձին դեպքերում այն հասնում է 50 տոկոսի։ Սա լուրջ կշիռ է ու հաշվարկները վկայում են, որ այլընտրանքային էներգետիկայի ամբողջ ռեսուրսները եթե օգտագործվեն, ապա բոլորը միասին լավագույն դեպքում կարող են ապահովել միայն 28 տոկոսը»։

Դիտարկմանը, թե արդյո՞ք ունի տպավորություն, որ հարցը հենց քաղաքականացվում է, նա պատասխանեց, որ դա ակնհայտ է։ «Ռուսական կողմի հետ կա ստորագրված փաստաթուղթ և նպատակահարմար կլիներ հենց ռուսական կողմի հետ քննարկել նոր կայանի կառուցման հարցը։ Պետք է լավատես լինել և հուսալ, որ լավագույն լուծումը կգտնվի ու կառաջադրվի, բայց դա հրաշքի նման մի բան է, քանի որ մեզ հայտնի է թե տնտեսության ու հատկապես գյուղատնտեսության ոլորտում վերջին տարիներին ինչ է կատարվել։ իսկ սա միայն տնտեսական ոլորտ չէ, այլ քաղաքատնտեսական խնդիր է՝ բառիս ամենախորը իմաստով, մինչդեռ դիլետանտությամբ տրվում են հանձնարարականներ, ու արհեսատվարժության պակասով էլ հարցերին լուծում են փորձում տալ»։

Աղբյուր` Փաստինֆո