Փաստ ինֆո

Առաջին հերթին պետք է հասկանալ, որ քաղաքական հայտարարությունները իրական գործողություններից մի փոքր տարբերվում են պրակտիկայում, դա նաև պատմությունն է ցույց տալիս։ Այս մասին «Փաստինֆոյի» հետ զրույցում ասաց արևելագետ, ԱԺ նախկին պատգամավոր Գոռ Գևորգյանն՝ անդրադառնալով Իրանի հոգևոր առաջնորդի հայտարարությանը, որ իրենց պարտքն են համարում վրեժխնդիր լինել՝ Իսմայիլ Հանիայի մահվան համար։ Ինչպես արդեն հայտնել ենք՝ «Համասի» քաղբյուրոյի ղեկավարը մեկնել էր Թեհրան՝ մասնակցելու Իրանի նորընտիր նախագահի երդմնակալության արարողությանը, ինչից հետո սպանվել է հենց Իրանում։

Գևորգյանի գնահատմամբ՝ Իսրայելի կողմից այս քայլում երկու հստակ ուղերձ պետք է դիտարկել, որոնք մեծ հաշվով Իսրայելի տարածաշրջանային քաղաքականության մեջ ամենևին էլ նորույթ չեն։

«Առաջինը՝ կապված է այն հանգամանքի հետ, որ Իսրայելը աշխարհին ցույց է տալիս, որ կարող է խոցել իր հակառակորդին ցանկացած վայրում։ Սա ցույց է տալիս նաև հոգեբանական առումով պետության այն կարգավիճակը, որի մասին այսօր իրենք խոսում են, այն է՝ պատրաստ են, հզոր են, ցանկացած վտանգի կարող են դիմակայել և այլն։ Հատկապես, եթե հաշվի առնենք, որ Իսրայելի նկատմամբ այսօր միջազգային հանրության կողմից մեծ ճնշումներ կան, ճնշումներ կան նաև երկրի ներսում՝ իշխանությունների կողմից վարած քաղաքականության հարցում, մասնավորապես, Գազայում իրականացրած գործողությունների հարցում։

Երկրորդը՝ ըստ էության ուղղված է Իրանին, ցույց տալու համար, որ անգամ Իրանի տարածքում, այն էլ այն օրերին, երբ տեղի է ունենում նորընտիր նախագահի երդմնակալության կարգը՝ իրենք կարող են թիրախ խոցել։ Այս ամենը հստակ ուղերձ է պարունակում»։

Նրա դիտարկմամբ՝ թե ինչ կանի Իրանը՝ ցույց կտա ժամանակը, բայց ամեն դեպքում, սա մարտահրավեր է Իրանին և հիմա պետք է սպասել և տեսնել, թե ինչպես Իրանը դրան կարձագանքի։

«Այն քաղաքական հայտարարությունները, որ արվում են, պետք է ընկալվեն ոչ միանշանակ, ինչպես նաև մյուս քաղաքական առաջնորդների կողմից արված քաղաքական հայտարարությունները, որովհետև գործնականում դրանք կարող են իրարից տարբերվել։

Ընդհանրապես, նման իրավիճակում որոշումները միանգամից չեն կայացվում, դրանք համապատասխան ընթացակարգով են անցնում, ներքին խողովակներով տարբեր հարցեր են համաձայնեցվում, հաշվի է առնվում միջազգային իրադրությունը, տարբեր արտաքին խաղացողների դիրքորոշումը և ակնկալվող վերաբերմունքը։

Այսինքն, հայտարարությունն անելուց հետո, չպետք է ակնկալել, որ դա անմիջապես կարող է կյանքի կոչվել։ Այս իրավիճակում պետք է առաջնորդվել փաստերով. փաստն այն է, որ արվել է հայտարարություն, հիմա պետք է սպասել զարգացումներին»։

Աղբյուր` Փաստինֆո