Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, ընթանում է Ազատ գյուղի տարածքում տեղակայված զինվորական կացարանում 15 զինծառայողի կյանք խլած ողբերգական հրդեհի գործով դատավարությունը։ Այսօր շարունակվեց վկա Արսեն Սողոմոնյանի հարցաքննությունը, որը մեկ այլ քրեական վարույթի շրջանակներում մեղադրյալի կարգավիճակ ունի։

Հենց Արսեն Սողոմոնյանին է պատկանում ծնողների կողմից դեպքի վայրում հայտնաբերված հեռախոսը, որի՝ դեպքի ժամանակ կացարանում գտնվելը կասկածի տակ է առնում տուժող կողմը։ Մասնավորապես, վկան պնդում է, թե դեպքի վայրում հայտնաբերված «Նոկիա» հեռախոսը դեպքից առաջ զինծառայողներից Տարոնին է փոխանցել՝ լիցքավորման դնելու համար, քանի որ ինքը իբրև պետք է ջրի գնար, սակայն տուժողների իրավահաջորդների ներկայացուցիչ Նորայր Նորիկյանը կասկածներ ունի, որ դեպքի վայրում հայտնաբերված հեռախոսը կարող է դեպքից հետո տեղադրված լինել այնտեղ, քանի որ բավականին լավ վիճակում էր, նման հրդեհի պայմաններում չէր կարող հեռախոսը նման լավ վիճակում լինել։

Հայտնաբերված հեռախոսի հեռախոսազանգերը ստուգվել են, վկան պնդեց, թե զանգել է հորն ու մորը, սակայն դեպքից հետո՝ ժամը 04,30-ի սահմաններում, այդ հեռախոսից զանգ է եղել նաև նրա հորեղբորը՝ Վահե Սողոմոնյանին, վկայի պնդմամբ՝ ինքը չի զանգել, թե ով պետք է զանգեր իր հորեղբորը՝ վկան պատասխան չունի։ Նորայր Նորիկյանը կասկածներ ունի, որ վկան տարածքում չի եղել դեպքի ժամանակ, հետագայում է հեռախոսը տեղադրել դեպքի վայրում՝ փորձելով իր այլուրեքությունը ֆիքսել և, որ վկան դատարանում ստում է։
Տուժողների ներկայացուցիչը ևս մեկ անգամ ընդգծեց՝ դեպքի վայրը խախտվել է, որևէ մեկն իրավունք չուներ հեռացնել զինծառայողների մարմինները՝ մինչև քննչական գործողությունները, ինչն է եղել պատճառը, որ պատշաճ դեպքի վայրի զննություն չի կատարվել։ Նորիկյանը նշեց՝ չի կարող պատկերացնել, որ մի ամբողջ քննչական խումբ, դատախազություն, ՌՈ, կարող է սրբագրել այնպիսի կարևորագույն ապացույց, ինչպիսին կարող է լինել տարածքի տեսանկարահանման համակարգը։ Նրա խոսքով՝ խնդիր է դրվել՝ սաբոտաժ անելու, թաքցնելու դեպքի իրական հանգամանքները։ Տուժողների իրավահաջորդների ներկայացուցչի հայտարարությունը դուր չեկավ հանրային մեղադրողին։ Վերջինս հայտարարությամբ հանդես եկավ՝ նշելով, թե դատախազության վրա սլաքներ ուղղելով ի՞նչ են ուզում ապացուցել։ Նրա խոսքով՝ դատախազը, ուսումնասիրելով գործի նյութերը, չի կարող հանգել եզրակացության, որ այս ինչ տեղը կարող է տեսախցիկ լինել կամ հեռախոս լինել, դեպքի վայրի զննություն իրականացնողը դատախազությունը չէ։ Դատախազի այս հայտարարությունից հետո իրավիճակը լարվեց դատարանում, տուժող կողմը դժգոհություն հայտնեց, վեճ սկսվեց կողմերի միջև։

Հիշեցնենք, որ ողբերգական դեպքը տեղի է ունեցել 2023թ․ հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո