Փաստ ինֆո

Երկուսն էլ՝ Դադիվանքն ու Գանձասարը, ակադեմիական և գիտական հարթակներում բազմակողմանի ուսումնասիրված հայկական ճարտարապետության գլուխգործոցներ են, որոնց յուրացումը տարիներ շարունակ ադրբեջանական հակամշակութային քաղաքականության դրսևորում է,- ասել են ԿԳՄՍ-ից՝ արձագանքելով «Փաստինֆո»-ի հարցին, թե ինչ քայլեր են անում հակազդելու ադրբեջանական կեղծ քարոզչությանը։

Ընդդիմադիր պատգամավոր Լիլիթ Գալստյանն այսօր բարձրաձայնել էր ադրբեջանական կեղծ քարոզչության եւս մեկ դրսեւորման մասին։ Վատիկանում լույս տեսնող L'Osservatore Romano պարբերականում, Ռոսսելա Ֆաբիանիի ստորագրությամբ օրերս լույս է տեսել «Քրիստոնեության ակունքներն Ադրբեջանում․ ալբանական առաքելական եկեղեցու հետքերով» բովանդակությամբ մի հոդված, որի հեղինակը օկուպացված Արցախում գտնվող Դադիվանքն ու Գանձասարը ներկայացրել է որպես ալբանական։

Ինչ է անում Հայաստանը՝ ի մասնավորի ԿԳՄՍ-ն, ադրբեջանական կեղծ քարոզչությունը կանխարգելելու ուղղությամբ։ Նախարարությունից վստահեցնում են, թե իրենց լիազորությունների շրջանակներում ակտիվ համագործակցում են բնագավառի բոլոր շահագրգիռ միջազգային կազմակերպությունների և անհատների հետ՝ Լեռնային Ղարաբաղի հայկական մշակութային ժառանգության պահպանության ուղղությամբ։

«Տարբեր միջազգային հարթակներում (ՅՈՒՆԵՍԿՕ, Եվրոպական խորհուրդ և այլն) նիստերի, համաժողովների, գիտաժողովների ընթացքում ՀՀ ԿԳՄՍ նախարարության հայկական կողմի ներկայացուցիչներն առանձանահատուկ ձևով բարձրացնում են Լեռնային Ղարաբաղի պատմության և մշակույթի հուշարձանների հետագա պահպանության հարցերը, վեր հանում Ադրբեջանի կողմից իրականացված վանդալիզմի փաստերը և հրավիրում միջազգային կազմակերպությունների ուշադրությունը Լեռնային Ղարաբաղի հուշարձանների հետագա պահպանությունն ապահովելուն միտված աշխատանքների օժանդակմանը, հակափաստարկում ադրբեջանական պատվիրակություններին։ Մասնավորապես՝ Դադիվանքը և Գանձասարը «աղվանական մշակույթի և աղվանական եկեղեցու խոշորագույն դրսևորումներ» ներկայացնող հոդվածը պատմությունը կեղծելու ադրբեջանական շարունակական կեղծ կարոզչության հերթական անհեթեթ դրսևորումն է։ Երկուսն էլ վաղուց ակադեմիական և գիտական հարթակներում բազմակողմանի ուսումնասիրված հայկական ճարտարապետության գլուխգործոցներ են, որոնց յուրացումը տարիներ շարունակ ադրբեջանական հակամշակութային քաղաքականության դրսևորում է,- «Փաստինֆո»-ի հարցամանն ի պատասխան փոխանցեցին ԿԳՄՍ նախարարության հասարակայնության հետ կապերի բաժնից։

Նկատենք, որ Վատիկանում Հայաստանն ունի դիվանագիտական ներկայացուցչություն, ու մինչ ՀՀ պետական մարմինները միմյանց են պատասխանատու համարում ադրբեջանական կեղծ քարոզչությանը հակազդելու եւ նման հրապարակումների համար պատասխանատվության հարցը բարձրացնելու համար՝ Բաքուն շատ ակտիվ աղավաղում է պատմությունը։

Աղբյուր` Փաստինֆո