Փաստ ինֆո

Արդեն տևական ժամանակ է՝ քննչական մարմինները փորձում են տարանջատել ԴՆԹ ունեցող և չունեցող մարմինները։ Այս մասին «Փաստինֆո»-ի հետ զրույցում ասաց անհետ կորածի զինծառայողի ազգական Արսեն Ղուկասյանը՝ անդրադառնալով այսօր ԱԱԾ-ի մոտ անհետ կորած զինծառայողների հարազատների բողոքի ակցիային։

«Ասում են, եթե ԴՆԹ ունենք՝ ուրեմն մենք այլևս քո երեխայով չպիտի զբաղվենք, մենք մեր արածն արել՝ վերջացրել ենք։ Բայց ԴՆԹ փորձաքննության արդյունքները ոչ պատշատ են կատարվել ու բավական մեծ թվով անճշտություններ կան, ավելին՝ կա 6 արտաշիրիմում, որոնք սխալ փորձաքննության արդյունք են, հետևապես, ոչ մեկ չի կարող երաշխավորել, որ այդ 6-ը՝ 60 կամ 600 չի։ Ուստի, մարդիկ չեն հավատում ԴՆԹ փորձաքննությունների արդյունքներին»,- ասաց Ղուկասյանը։

Նա նշեց, որ ծնողների մի մասը կասկածում են ԴՆԹ փորձաքննության արդյունքներին, ընդ որում՝ ծնողների մեծ մասի փաստարկները, թե ինչու չեն հավատում այդ արդյունքներին՝ բավական հիմնավոր են, թեև կան նաև զգացմունքային պնդումներ։

«Իրենք բերում են ԴՆԹ արդյունքները և ասում՝ սա քո երեխան է, բայց մարդը բավարար հիմքեր է ներկայացնում՝ պնդելով, որ իր երեխայի մասունքները չեն։ Ինչու պիտի մարդը վերցնի այդ երեխային ու տանի հուղարկավորի։ Ուրիշի երեխային վերցնես՝ թաղես, անունն ի՞նչ դնես, հատկապես, որ եղել են դեպքեր, որ պարզվել է՝ ուրիշին են հուղարկավորել։

Սա մարդկանց ճակատագրերի հարց է։ Այս մարդիկ ասում են՝ եթե մարդը ԴՆԹ փորձաքննություն ունի՝ չի նշանակում, որ պետությունը պետք է այդ անձով չզբաղվի։ Ես դեպք ունեմ, երբ մի երեխա եկավ՝ նկար ցույց տվեց, ասեց էս մարմինը, որ տվել են որպես Հովոյի մարմին, դա Հովոն չի, մարդը հստակ ապացույցներով ներկայացնում է։ Գնացեք Եռաբլուր նայեք, տեսեք քանի շիրիմ կա, որ անտեր շիրիմ է դարձել։ Տարել հուղարկավորել են ու ասում են՝ իմը չի։ Սա անընդունելի է»,- ասաց Ա. Ղուկասյանը։

Դիտարկմանը, որ, երբ վերջին անգամ Ադրբեջանի կողմից զոհվածների մասունքներ փոխանցեց Հայաստանին՝ մեր կառավարությունը պնդում էր, որ այլևս անհետ կորածներ չունենք՝ Ղուկասյանն ասաց, որ վաղուց իրեն թույլ չեն տալիս կառավարության շենքում տեղի ունեցող հանդիպումներին մասնակցել։ «Բայց ծնողները պատմում են, որ վերջին հանդիպման ժամանակ հարցրել են, թե Փաշինյանը ինչ է մտածում՝ Ադրբեջանում ունե՞նք անհայտ կորած մարդիկ, ովքեր բռնի գտնվում են Ադրբեջանում։ Նա պատասխանել է, որ այդ հարցի վերաբերյալ ինքը կարծիք չունի և առաջնորդվում է փաստերով, իսկ իր համար փաստն այն է, որ Ալիևն ասում է՝ չունեմ։ Որ մեր ձեռքի տակ վիդեոներ կան, ֆոտոներ՝ դրանք փաստ չեն, բայց որ Ալիևը երդվում է՝ փաստ է։ Ասել է՝ ասեմ ավելին, Ալիևը երդում է կերել, որ չունի, նա դա համարում է փաստ ու դրանով է առաջնորդվում»։

Մանրամասները՝ տեսանյութում։

Աղբյուր` Փաստինֆո