Փաստ ինֆո

Աղստև գետի վրա կառուցված ժամանակավոր կամուրջը, որ քանդվել էր գետի վարարման հետևանքով, դեռ չի վերակառուցվում։ Խաշթառակի վարչական ղեկավար Անդրանիկ Վիրաբյանը «Փաստինֆոյի» հետ զրույցում ասաց, որ վերականգնման աշխատանքները դեռ չեն սկսվել։

«Էս պահին ոչ մեկ էլ ոչ մի բան չի կարող անել, գետը պիտի հանդարտվի, որ կարողանանք գործ անել։ 3.5 մետր բարձրացել է գետը։ Այլընտրանքային ճանապարհ ունենք, այս պահին գործում է։ Գյուղում պարենի կամ այլ խնդիր չունենք, ամեն ինչով ապահովված ենք։ Միակ խնդիրն էն է, որ Իջևան հասնելու համար առաջ 7 րոպե էինք գնում, հիմա շատ ավելի ժամանակ է պետք»։

Դիտարկմանը, թե մայիսյան հեղեղումներից հետո կառավարությունը նախատեսված փոխհատուցումները սկսե՞լ է հատկացնել՝ Վիրաբյանը պատասխանեց, որ համապատասխան հանձնաժողովները եկել են, արձանագրել են, գրանցել են։ «Կառավարության որոշելիքն է, թե երբ են սկսելու փոխհատուցումների տրամադրումը, երբ սկսեն, բոլորս էլ կիմանանք»։

Հիշեցնենք, որ տևական անձրևների հետևանքով Աղստև գետը նախօրեին կրկին վարարել էր, արդյունքում վնասվել է Տավուշի Խաշթառակ գյուղ տանող ժամանակավոր կամուրջը, որը վերջերս էր կառուցվել։ Խաշթառակ և Լուսահովիտ գյուղեր տանող կամուրջն այժմ երկկողմանի փակ է:

Հիմնական կամրջի հենապատը փլուզվել էր մայիսին տեղի ունեցած հեղեղումների ժամանակ։

Աղբյուր` Փաստինֆո