Փաստ ինֆո

Լիբանանում վտանգավոր վիճակ է, մտահոգություններ կան, որ բախումները կարող են վերահսկողություն դուրս գալ և տարածվել։ Այդ մասին «Փաստինֆո»-ին ասաց Լիբանանանի «Ազդակ» օրաթերթի գլխավոր խմբագիր, հրապարակախոս, վերլուծաբան Շահան Գանտահարյանը։

Նրա փոխանցմամբ՝ անվտանգային իրավիճակը կտրուկ փոխվեց, երբ երեկ հրթիռակոծվեց Գոլանի բարձունքներում գտնվող Մաջդալ Շամս բնակավայրը։

Թել Ավիվը հրթիռակոծության մեջ մեղադրել է լիբանանյան «Հզբոլլահ» խմբավորմանը, թեեւ վերջինիս ներկայացուցիչները հերքել են մեղադրանքները:

«Հետաքրքիր էր նաև տեղի բնակչության հակազդեցությունը։ Տեղի բնակիչները մերժեցին, չընդունեցին Թել Ավիվի կեցվածքը և անգամ մերժեցին զոհերի հուղարկավորությանը Իսրայելի պաշտոնյաների մասնակցությունը»,- նշեց Գանտահարյանը։

Գանտահարյանն ուշագրավ համարեց նաեւ ստեղծված իրավիճակի շուրջ ԱՄՆ-ի և Թուրքիայի հայտարարությունները. ԱՄՆ-ն մի կողմից հայտարարեց, որ Իսրայելն իրավունք ունի ինքնապաշտպանվելու, մյուս կողմից նաև հորդորեց կողմերին՝ չընդլայնել ռազմական բախումները եւ լայնամասշտաբ պատերազմի չվերածել։ Իսկ Թուրքիայի նախագահի հայտարարությունն ինքնախոստովանություն էր, երբ Էրդողանն ասաց, որ ինչպես մտան Ղարաբաղ և Լիբիա, կարող են մտնել նաև Իսրայել։ «Սա ինքնախոստովանանք է, որ թուրքական բանակն է կռվել , մտել է Հարավային Կովկաս կամ Արցախ։ Ու կան կարծիքներ, որ եթե Թուրքիան չլիներ, ապա Ադրբեջանը չէր հաղթի այս պատերազմում։ Պաշտոնական Երևանը, կարծում եմ, սա պետք է լիարժեք օգտագործի, միջազգային ատյաններին դիմի, որ փաստորեն Արցախի պատերազմի ոչ միայն հրահրողը, այլև ուղղակի մասնակիցը Թուրքիան էր, որի հետևանքն էր՝ էթնիկ զտումը, տարածաշրջանի ամբողջական հայաթափումը, ժողովրդագրական պատկերի փոփոխությունը»,- նկատեց Շ.Գանտահարյանը։

Լիբանանի հարավային շրջաններում, որտեղ այս պահին տեղի են ունենում բախումները, հայկական համայնք չկա, այդ առումով, կարելի է ասել, հայերի համար մի փոքր անտանգ է, սակայն ընդհանուր առմամբ երկրում է լարված վիճակ. Շ. Գանտահարյանի փոխանցմամբ՝ սպասողական։

Աղբյուր` Փաստինֆո