Փաստ ինֆո

Քրեական ենթամշակույթի հատկանիշներով նախաձեռնված քրեական վարույթի շրջանակներում 3 անձի նկատմամբ քրեական հետապնդում է հարուցվել, այդ թվում՝ «Նորատուսցի Ալիկ» մականունով հայտնի Ալիկ Բանդուրյանի նկատմամբ։ ՔԿ մամուլի քարտուղար Գոռ Աբրահամյանը «Փաստինֆո»-ի հետ զրույցում հայտնեց, որ նրանցից մեկի նկատմամբ հետապնդում է հարուցվել ՀՀ քրեական օրենսգրքի 322-րդ հոդվածի 1-ին մասով (Քրեական աստիճանակարգության բարձրագույն կարգավիճակ տալը կամ ստանալը կամ պահպանելը) և 323-րդ հոդվածի 2-րդ մասի 5-րդ կետով (քրեական աստիճանակարգության բարձրագույն կարգավիճակ ունեցող անձի կողմից

քրեական ենթամշակույթ կրող խմբավորում ստեղծելը կամ ղեկավարելը), մյուս երկուսի նկատմամբ՝ ՀՀ քրեական օրենսգրքի 324-րդ հոդվածի 1-ին մասի ( քրեական ենթամշակույթ կրող խմբավորմանը մասնակցելը կամ դրա հետապնդած նպատակների իրականացմանը ներգրավված լինելը) հատկանիշներով:

«Վերջիններիցս մեկը ձերբակալվել է։ Մյուսներին հայտնաբերելու և վարույթն իրականացնող մարմնին ներկայացնելու հանձնարարություն է տրված։ Վարույթի շրջանակներում, ակտիվ ապացուցողական և վարութային գործողությունները շարունակվում են, այդ թվում՝ ԱԱԾ աշխատակիցների օժանդակությամբ, առանձին հասցեներում և օբյեկտներում կատարվում են միաժամանակյա խուզարկություններ»,- հայտնեց Գոռ Աբրահամյանը։

Նշենք, որ ԱԱԾ աշխատակիցները խուզարկություններ են իրականացրել նաև «Լա Դեֆանս» հյուրանոցում և, ըստ շրջանառվող լուրերի, հենց այս գործի շրջանակներում։

Հեղինակ՝ Իզաբել Սահակյան

Աղբյուր` Փաստինֆո