Փաստ ինֆո

Փոքր Վեդիի մանկապարտեզում սանի նկատմամբ բռնություն գործադրելու դեպքով ձերբակալված դաստիարակը շարունակում է գտնվել արգելանքի տակ։ Այս մասին «Փաստինֆո»-ն տեղեկանում է ՔԿ-ից։

Հիշեցնենք, որ հուլիսի համացանցում տեսանյութ էր տարածվել, համաձայն որի՝ մանկապարտեզում քնի համար նախատեսված ժամին բռնության է ենթարկվել երեխան։ Պարզվել է, որ երեխային բռնության ենթարկող աշխատակիցը 45-ամյա կին է, վերջինս ձերբակալվել է։ Ավելին, վերջինիս ձերբակալությունից հետո համացանցում տարածվել է նրա լուսանկարը, պարզվել է՝ ՔՊ համախոհ է, իսկ մանկապարտեզի տնօրենը եղել է ՔՊ ավագանու անդամ։

ՔԿ մամուլի քարտուղար Գոռ Աբրահամյանը «Փաստինֆո»-ի հետ զրույցում հայտնեց, որ դաստիարակին մեղադրանք է ներկայացվել ՀՀ քրեական օրենսգրքի 196-րդ հոդվածի 2-րդ մասի 3-րդ կետով, այն է՝ անչափահասին ֆիզիկական ուժեղ ցավ կամ հոգեկան տառապանք պատճառելը, անձը դեռևս արգելանքի տակ է։ ՔԿ-ից հայտնեցին, որ երեխայի մայրը ճանաչվել է տուժողի օրինական ներկայացուցիչ, նա և տնօրենը հարցաքննվել են։

«Մանկապարտեզում այլ նմանատիպ դեպքի վերաբերյալ այս պահի դրությամբ քննությամբ դեռևս տվյալներ չեն ստացվել, սակայն այդ ուղությամբ քննություն իրականացվում է, նոր հանգամանքներ ի հայտ գալու դեպքում քրեադատավարական կարգով համապատասխան ընթացք կապահովվի»,- ասաց Գոռ Աբրահամյանը։

Հեղինակ՝ Իզաբել Սահակյան

Աղբյուր` Փաստինֆո