Փաստ ինֆո

Այսօր բազմաթիվ լրատվամիջոցների՝ ՀՀ ԱԳՆ-ին ուղղված հարցի պատասխանը, այն է՝ Հայաստանը 3+3 ձևաչափով Թուրքիայում առաջիկայում տեղի ունենալիք հանդիպմանը մասնակցելու՞ է արդյոք, որքան էլ տարօրինակ լինի՝ պատկան մարմիններից չի հաջողվում ճշտել։ Իշխանությունը հստակ պատասխանից խուսափում է՝ ընդհանրական, խուսափողական բառեր գործածելով։

Այս մոտիվացիան, ի դեպ, փաշինյանական իշխանության պարագայում բնավ էլ աննախադեպ չէ, գրեթե միշտ այսպես է եղել, որը թույլ է տալիս եզրակացնել, որ պատասխանի տերն իրենք չեն։ Խոսք ասողն իրենք չեն, որոշում կայացնողն իրենք չեն, իրենք ընդամենը արդեն իսկ իրենց վերաբերյալ կայացված որոշումը փոխանցողի դերն են կատարում։ Սա ցավալի արձանագրում է, ցավալի է, քանի որ իրենք են այսօր մեր պետությունը՝ Հայաստանի Հանրապետությունը ներկայացնում։

Իսկ մինչ ինքնիշխանության մասին բազմիցս ճոռոմաբանող քպական իշխանությունն իր ասելիքին չի տիրապետում, իրապես ինքնիշխան պետության՝ Իրանի դեսպանը Հայաստանում՝ այս թեմային մանրամասն անդրադառնում է՝ SNN-ին հստակ տեղեկատվություն հաղորդելով՝ «մոտ ժամանակներս Թուրքիայում տեղի ունենալիք՝ «3+3» ձևաչափով (Հայաստան, Ադրբեջան, Իրան, ՌԴ, Թուրքիա, Վրաստան) արտգործնախարարների հանդիպման մասին (Հայաստան, Ադրբեջան, Իրան, ՌԴ, Թուրքիա, Վրաստան) և այս համատեքստում շեշտելով իրանական կողմի համար Հայաստանի Սյունիքի մարզի անվտանգության կարևորությունը, միաժամանակ՝ հայտարարելով, որ «Սա ռազմավարական տարածաշրջան է, որը կարևոր դեր է խաղում Իրանի և Հայաստանի միջև անվտանգության և առևտրի ապահովման գործում»։ Ի դեպ, նա հատուկ շեշտում է նաև, որ «Կապանում Իրանի գլխավոր հյուպատոսության բացումը նպաստել է սահմանային հաղորդակցության բարելավմանը»։

Հիմա, որևէ պետության ինքնիշխանության մասին սույն համապարփակ տեղեկատվությունը փորձենք համադրել ՀՀ ԱԳՆ մամլո խոսնակի՝ «Փաստինֆո»-ին տված պատասխանի հետ։ Ասվում է՝ «3+3» հարթակի հաջորդ հանդիպմանը ՀՀ մասնակցության վերաբերյալ պատշաճ ժամկետներում կտեղեկացնենք»:

Նախ, ի՞նչ ասել է պատշաճ ժամկետ, երբ արդեն իսկ խնդրո առարկա հանդիպման մասին SNN-ին հայտնել է ՀՀ-ում Իրանի դեսպանը։ Ի՞նչ է, Հայաստանի ԱԳՆ-ն վախենու՞մ է իր անունից կոնկրետ պատասխան տալ ։ Հարց՝ իսկ ե՞րբ է գալու պատշաճ ժամկետը և ո՞վ է որոշելու պատշաճության կոնկրետ օրն ու ժամը։ Առավել եւս, երբ որոշումը կայացվել է 2023թ. հոկտեմբերին Թեհրանում տեղի ունեցած հանդիպմանը, ինչին մասնակցել է նաեւ Արարատ Միրզոյանը: Համենայն դեպս, հենց այդ հանդիպումից հետո տեղի ունեցած ճեպազրույցում է այդ մասին հայտարարել Լավրովը: Իսկ հիմա Հայաստանը զգուշանում է խոսել այդ մասին:

Համաձայնեք, Իրանը ներկայացնող դիվանագետի սպառիչ պատասխանների համապատկերում ՀՀ խուսափողական պատասխանը առավել քան զավեշտալի է։

Ընդ որում, հայտնի է նաև, որ Վրաստանն այլևս 3+3-ից դուրս է եկել․ իր պետության շահերից բխող սեփական փաստարկներն ունենալով վերջինս հրաժարվել է մասնակցել հանդիպումներին։ Ահա և ինքնիշխանության մեկ այլ դրսևորում։

Իսկ «ինքնիշխան» Հայաստանը դեռ սպասում է։ Ու՞մ է սպասում... գուցե տարածաշրջանային այս ձեւաչափից խուսափելու մեսիջ է հղվել որոշ խաղացոցների կողմից։ Սա՛ է ինքնիշխանության աննախադեպ, զուտ փաշինյանական դրսևորումը։

Աղբյուր` Փաստինֆո