Փաստ ինֆո

Չարենցավան համայնքի անձնագրային բաժինը Հրազդան տեղափոխելու որոշման դեմ պայքարող չարենցավանցիներն այս պահին Կոտայքի մարզպետարանի դիմաց են։

Ակցիայի մասնակիցները մեկը մարզպետարանի պատին փակցրեց ՆԳ նախարար Վահե Ղազարյանի հրաժարականի պահանջով ցուցանակ։

«Եկեք օգնեք մեզ»,-ասաց ցուցարարներից մեկը՝ դիմելով մարզպետարանի աշխատակիցներին ու ոստիկաններին, որոնք փորձում էին խոչընդոտել իրենց բողոքի ակցիային։ «Հերիք է, էլի, երկիրը հանձնելով եկան։ Իբր չենք հասկանում ինչ է կատարվում, ձեզ էլ հիմա տանեն Բաքու՝ էլի ձեն չեք հանելու, չէ՞»,-ասաց ակցիայի մասնակիցը։

Նա նաև հայտարարեց, որ իրենց հարցնում են, թե ինչի եք ակցիա անում մարզպետարանի մոտ, ի՞նչ կապ ունի մարզպետը ոստիկանապետի հրամանի հետ, բանն այն է, որ մարզպետը կառավարության ներկայացուցիչն է, երաշխավորում է համայնքների համաչափ զարգացումը։ «Եթե մի համայնքից պետական ենթակառուցվածքները հանում, տանում են մեկ այլ համայնք, օրինակ , եթե Չարենցավանում չկա հարկադիր ծառայություն, եթե Չարենցավանում չկա դատախազություն, եթե Չարենցավանում չկա սանէպիդկայան, եթե Չարենցավանում չկա զինկոմիսարիատ, այսօր էլ չկա անձնագրային բաժին, վաղը չի լինի պոլիկլինիկա, դա նշանակում է, որ Չարենցավանի համեմատ Հրազդանը համաչափ չի զարգանալու։

Մարզպետն այստեղ մեծ անելիք ունի։ Դրա համար այստեղ ենք, որ հուշենք՝ դու երաշխավորում ես համայնքային համապատասխան զարգացում։ Եթե պետական ենթակառուցվածքն իր կառույցը հանում է մի բնակավայրից, տանում ուրիշ, նշանակում է, որ այդ բնակավայրը, որտեղ կենտրոնացվում է պետական կառավարումը, այդ համայնքը զարգանում է, իսկ այն համայնքը, որտեղ չկա պետական ենթակառույց, տեղում դոփելու կամ հետ է գնալու»։

Աղբյուր` Փաստինֆո