Փաստ ինֆո

Գավառի համայնքապետարանը, շներին ստերջացնելով, իր առաքելությունը համարում է ավարտված եւ ոչինչ, որ թափառական շները հարձակվում են եւ վնասում մարդկանց, այդ թվում՝ երեխաներին։

Ինչպես արդեն հայտնել ենք՝ արտակարգ դեպք է գրանցվել Գավառում. շունը հարձակվել է 6 տարեկան աղջկա վրա ու կծել, երբ վերջինս ավագ քրոջ ու եղբոր հետ՝ համապատասխանաբար 10 եւ 12 տարեկան, գնալիս է եղել մանկապարտեզ։ Մեծ քույրն ու եղբայրն են քարերով վախեցրել շանը ու նրա ձեռքից ազատել իրենց քրոջը, ամբողջովին արյունոտված տուն հասցրել։

Փոքրիկի վնասվածքները խորն են եղել, եւ հիվանդանոցում, ինչպես հայրն է ասել, մի քանի կար են դրել։

«Դիմել ենք Գավառի համայնքապետարան, մարզպետարան, բայց բոլորը ասում են, որ իրենք իրավասություն չունեն, պետք է դիմենք Շրջակա միջավայրի նախարարություն»,- հայտնել է հայրը։

«Փաստինֆո»-ի հետ զրույցում Գավառի համայնքապետարանից հայտնեցին, որ մեկ տարվա ընթացքում 100 շուն են ստերջացրել։

«Այս տարի ևս մրցույթ է իրականացվել՝ այդ ուղղությամբ կատարվելիք աշխատանքի համար, այդքանն է մեր իրավասությունը, այլ իրավասություն չունենք,- «Փաստինֆո»-ին ասաց Գավառի համայնքապետարանի մամուլի քարտողար Ալլա Մանուկյանը՝ համարելով, որ ցավալի դեպք է տեղի ունեցել,բայց չգիտեն, թե համայնքապետարանը ինչ պետք է անի, որ երեխայի ծնողը շան հարձակման համար իրենց չմեղադրի։

«Այլ միջոցներ կիրառելու հնարավորություն չունենք, ես հասկանում եմ, որ ստերջացման տարբերակը մասնակի լուծում է, բայց այդքանն է մեր իրավասությունը,- պնդում է Ա.Մանուկյանը։

Հետաքրքիր է՝ եթե քաղաքային իշխանությունն իրեն պատասխանատու չի համարում իր համաքաղաքացիների՝ անվտանգության համար, ապա ո՞վ է պատասխանատու։ Ի վերջո, շներին ստերջացնելը հաշվետվության համար չէ, որ արվում է, այլ՝ բնակիչների անվտանգության համար եւս, եւ եթե քաղաքում կան ոչ ստերջացված կամ կատաղած թափառական շներ, ապա տեղի իշխանությունները ուղղակի պարտավոր են քայլեր ձեռնարկել՝ թե շների, թե մարդկանց անվտանգությունն ապահովելու համար, քանզի վաղը նույն ծնողը կամ մեկ ուրիշը՝ իր երեխային պաշտպանելու համար կարող է շատ ավելի կոշտ քայլերի դիմի՝ նման դեպքի առնչվելիս։

Աղբյուր` Փաստինֆո