Փաստ ինֆո

ԲՈՒՀ-երի միասնական քննությունների հիմնական փուլն ավարտվել է, թափուր տեղերի համար մրցույթը շարունակվում է, մեկ դրական գնահատական ունեցողները կարող են դիմել հեռակա բաժիններ՝ կրկնելով այն առակայի քննությունը, որի դրական շեմը չեն հաղթահարել։ Այսօր տեղի ունեցած մամուլի ասուլիսում ասել է ԳԹԿ տնօրենի տեղակալ Կարո Նասիբյանը։

Նրա փոխանցմամբ՝ ավելի քան 6000 տեղ թափուր է մնացել։ Այսպես՝ հանրապետության տարբեր բուհեր այս տարի դիմել է 14 հազար 332 անձ, մինչդեռ հատկվացված է եղել 16 038-ը, որից անվճարը՝ 2117, վճարովին՝ 13 հազար 921։ Այսինքն, ինչպես նշեց պաշտոնյան, տեղերն ավելի շատ են հատկացված եղել, քան ընդհանրապես դիմորդ ենք ունեցել։ Անհրաժեշտ շեմը հաղթահարել ու անվճար ընդունվել է 1849 հոգի, իսկ 7569-ը՝ վճարովի հիմունքով։

Ընդհանուր առմամբ՝ ԲՈՒՀ ընդունվելու հայտ է ներկայացրել շրջանավարտների 72 տոկոսը, ինչը բանախոսը ցածր ցուցանիշ չի համարվում՝ ավելացնելով, որ խոսքը գնում է միայն ԳԹԿ-ում առկա տվյալների մասին, մինչդեռ մի շարք այլ բուհերի՝ Սլավոնական, Ֆրանսիական, Ամերիկյան համալսարաններում ընդունելությունը ԳԹԿ-ն չի կազմակերպում։

Լրացուցիչ փուլում հիմնական մրցույթից դուրս մնացած դիմորդները հնարավորություն ունեն ընտրել մինչև 6 բուհ կամ նույնքան մասնագիտություն։ Թափուր տեղերի ցանկին կարող են ծանոթանալ dimord.am կայքում։ Հայտագրումն ավարտվելու է հուլիսի 26-ին՝ ժամը 18։00-ին։

Կ. Նասիբյանի փոխանցմամբ՝ վերջին տարիներին նկատվում է հատկապես գյուղատնտեսական մասնագիտությունների նկատմամբ հետաքրքրության նվազում, այս պահի դրությամբ Ագրարային համալսարան ընդունվել է 50 հոգի։ Չեն համալրվել նաեւ ԵՊՀ-ի քիմիայի ֆալուլտետի անգամ անվճար տեղերը. ընդունվել է միայն 9 դիմորդ։

«Այս տարի ամենաշատ մրցակցությունը եղել է ստոմատոլոգիա բաժնում, որին հաջորդում է հանրային քաղաքականություն և կառավարում բաժինը, այնուհետև իրավագիտությունը։ Մեզ համար անսպասելիորեն ԵՊՀ-ի հասարակայնության հետ կապեր բաժնում ևս եղել է բավական մրցակցություն՝ մեկ տեղի համար 2 դիմորդ։ Տարիներ շարունակ մեծ պահանջարկ ունեցող տնտեսագիտություն, ֆինանսներ բաժիններն առաջին տասնյակում այս անգամ չկան»,- մանրամասներԿարո Նասիբյանը։

Ավելի վաղ «Փաստինֆո»-ն հայտնել էր, որ այս տարի մետաղորսիչ սարքեր էին տեղադրվել քննությունների ընթացքում դիմորդների տեխնիկական հնարամտությունները բացահայտելու համար։ Ընթացքը ցույց է տվել, որ ուշագրավ դեպքերի պակաս չի եղել։

«Բջջային հեռախոսները կոշիկների մեջ են փորձել անցկացնել, շղթաներն են օգտագործել բջջայինի հետ կապուղիները թաքցնելու համար։ Մեկ այլ դեպքով էլ ականջի խորքային հատվածում փոքր գնդիկներ են տեղադրել, որոնք ծառայել են որպես ականջակալներ»,- ասել է Նասիբյանը՝ նշելով, որ որոշ դեպքերում անգամ բժիշկների միջամտության կարիքն է եղել այդ գնդիկները հանելու համար։

Աղբյուր` Փաստինֆո