Փաստ ինֆո

Ինձ հնազանդեցնել հնարավոր չէ, քանի դեռ Արցախը ազատ չէ, Հայաստանը շղթայվում է՝ չեմ լռելու։ Այսօր դատարանի դալիճում հայտարարել է ՀՅԴ Հայաստանի ԳՄ անդամ Գերասիմ Վարդանյանը։

«Անցել է 2 տարի, երբ ինձ հենց այս դահլիճ բանտից էին բերում, այս նույն դահլիճում ասացի, որ եթե մենք գնանք այս ճանապարհով, ապա շուտով Արցախը չի լինի։ Անցել է երկու տարի, եթե մենք գնացինք այս ճանապարհով՝ Հայաստանը չի լինելու, ես արդեն չգիտեմ մյուս իմ դատավարությունը Հայաստանո՞ւմ է լինելու, թե՞ Բաքվում»,- ասել է Գ. Վարդանյանը։

Նրա փոխանցմամբ՝ 3 շարժում է եղել, որոնցից յուրաքանչյուր դեպքում էլ իր նկատմամբ հետապնդում է հարուցվել։ «Ինձ լռեցնել և հնազանդեցնել հնարավոր է միայն Արցախի և Հայաստանի ազատությամբ, քանի Արցախը ազատ չէ՝ չեմ լռելու , քանի Հայաստանը շղթայվում է՝ չեմ լռելու, պայքարը տևելու է այնքան ժամանակ , քանի դեռ Հայ ժողովուրդը հաղթանակ չի ունեցել։ Ես մեր ժողովրդի թշնամիներին ուզում ասել, եթե նույնիսկ իրենք իրենց աչքերով տեսնեն, որ ինձ հաղթել են, թո՛ղ չհավատան, - հայտարարեց ՀՅԴ ՀԳՄ անդամ Գերասիմ Վարդանյանը։

Նշենք, որ այս տեղի ունեցած դատական նիստը վերաբերում է 2020թ նոյեմբերի 9-ին կապիտուլյացիոն ակտի ստորագրմանը հաջորդած ակցիաներին, մասնավորապես՝ «Ազատություն» ՌԿ շենք մուտք գործելու դրվագին։ Գերասիմ Վարդանյանը, Բագրատ Եսայանը, Գառնիկ Մելքումյանը մեղադրվում են 2020 թվականի նոյեմբերի 10-ին Երևան քաղաքում տեղի ունեցած զանգվածային անկարգությունների ժամանակ խոչընդոտները վերացնելու եղանակով զանգվածային անկարգություններին օժանդակելու, ինչպես նաև խմբի կազմում լրագրողի մասնագիտական օրինական գործունեությանը խոչընդոտելու մեջ:

Աղբյուր` Փաստինֆո