Փաստ ինֆո

Օրեր առաջ «Փաստինֆոն» հրապարկել էր «Հավանաբար մտածել են Արարատն է պատկերված և հեռացրել են. փոխվել է Շիրակի պետական համալսարանի տարբերանշանը. Հեղինակը՝ «Ռեստարտ Գյումրին» է» վերտառությամբ նյութը, որտեղ համալասարանի Պատմության և իրավագիտության ամբիոնի դասախոս Գագիկ Համբարյանն իր դիտարկումներ էր հայտնել համալսարանի նոր տարբերանշանի վերաբերյալ։

Նյութի հրապարակումից հետո մեր խմբագրություն է զանգահարել տարբեանշանի մշակման աշխատանքները համակարգա՝ծ Շիրակի պետական համալասարանի հոգաբարձուների խորհրդի անդամ, ռեկտորի հասարակական հիմունքներով խորհրդական Գևորգ Ղուկասյանը՝ խնդրելով հրապարակել նաև իր դիտարկումները։
«Փաստինֆո»-ն, հարգելով պատասխան խոսքի իրավունքի իրացումը, ներկայացնում է նաեւ մյուս կողմի կարծիքը՝ վիճահարույց այդ հարցի վերաբերյալ։

Նա նախ պնդեց, որ Համաբարյանի տեղեկությունը, թե ինքն ավարտել է համալսարանը, իրականությանը չի համապատասխանում, քանի որ ինքը հանդիսանում է ՇՊՀ-ի ուսանող։ «Ես ուսանում եմ ՇՊՀ-ի մագիստրատուրայի 2-րդ կուրսում։ Կարող էր ռեկտորից ճշտել»,-ասաց Ղուկասյանը։

Հարցին, թե արդյոք խորհրդանշանի փոփոխության համար մրցույթ հայտարարվել է՝ Ղուկասյանը պատմեց, որ համալսարանի կողմից տարբերանշանի և դրոշի փոփոխության նախաձեռնություն չի եղել։ «Այսինքն, համալսարանը նման փոփոխություն չի նախատեսել, առաջարկը եղել է մեր կողմից; Դրան զուգեհեռ ռեկտորի կողմից հանձնարարություն է եղել Դեկերատիվ կիրառական արվեստ մասնագիտության դասախոսական համակազմին, ովքեր նույնպես պետք է աշխատեին բուհի տարբերանշանի և դրոշի տարբերակների վրա, բայց 2 տարիների ընթացքում չի ստեղծվել համապատասխան պատշաճ տարբերակներ։ Համալսարանն այս տարի 90 տարեկան է դառնալու, կա 90-ամյակի հանձնաժողով, որոնք դիտարկել են տարբերակների համապատասխանությունը բուհի ավանդույթներին պատմությանը, այն արժեքներին, որոնք ամրագրված են կանոնադրության մեջ։ Իրականում գումար չի նախատեսվել այս աշխատանքի համար»։

Ղուկասյանին վիրավորել էր դասախոսի այն պնդումը, թե «Երկու տարվա տաժանակիր աշխատանքի արդյունքում բուհի նախկին լոգոյի վրա շատ մեծ փոփոխություններ չեն կատարվել՝ գույնն են փոխել, Արագած սարն են հանել»։

Ուսանողը պնդում է, որ նոր Խորհրդանիշների բոլոր դետալները ստեղծվել են զրոյից։ «2,5 տարվա ընթացքում ստեղծվել է ՇՊՀ-ի նոր գերբի և դրոշի ավելի քան 10 տարբերակ։ Իսկ մինչ այդ բուհում որևէ մեկը չգիտեր, թե նախկին գերբի վրա պատկերվածը ի՞նչ շենք է, ինչ կապ ունի բուհի հետ և այլն, նույնը վերաբերվում է լեռանը։ Արագած լեռը քառագագաթ է, իսկ Արարատը երկու լեռներից է կազմված։ Նախկին տարբերանշանի վրա պատկերված լեռը ոչ Արագածին է նման, այսինքն, քառագագաթ չէ, ոչ էլ Արարատին, քանի որ ՀՀ-ում Արարատի Մասիս լեռը աջից է երևում, իսկ Սիսը՝ ձախից։ Գյումրուց Արագածը դիտելիս հյուսիային՝ ամենաբարձր գագաթը աջից է, իսկ հին գերբին՝ բարձր գագաթը ձախից է, այսինքն միայն երևակայության տեր մարդիկ կարող էին Արագածը Գյումրուց տեսնել այնպես, ինչպես այն երևում է Երևանից: Կարճ ասած, հին գերբի վրայի լեռը ոչ Արագածն է, ոչ էլ առավել ևս Արարատը»։

Նա նաև վստահեցրեց, որ արխիվային նյութերի և լուսանկարների ուսումնասիրության արդյունքում պարզ է դարձել, որ ՇՊՀ-ի նախկին գերբի վրա պատկերված և գրաֆիկորեն ոչ պրոֆեսիոնալ հավաքված և անհայտ ծագման հաստափոր սյուներով երիզված կիսատ-պռատ շենքը Լենինականի մանկավարժական ինստիտուտի շենքի՝ ներկայում՝ Տեխնոպարկի շենքը, կողային ֆասադի աղավաղված պատկերն է։ «Մենք, գերբը մշակելիս, լուսանկարների ուսումնասիրման արդյունքում բավարար ճշգրտությամբ վերականգնել ենք համալսարանի նախկին շենքի ավերված ֆասադի գրաֆիկական պատկերը՝ այն զետեղելով ՇՊՀ-ի նոր գերբի կենտրոնում»։

Անդրադառնալով տարբերանշանի կարմիր գույնին՝ նա ընդգծեց, որ այդ գույնն ընտրել են հեղինակավոր համալսարանների խոհրդանիշերի օրինակները ուսումնասիրելուց հետո։

««ՇՊՀ-ի գերբի ներքևում պատկերված է կիսաշրջանաձև ժապավեն։ Ժապավենի ձախ թևին գրված է ազատություն, աջ թևին՝ ազնվություն, իսկ մեջտեղում ՇՊՀ-ն է։ Այս հատվածը խորհրդանշում է ակադեմիական ազնվությունը և հայ ժողովրդի անմար ձգտումը դեպի գիտելիքն ու կրթությունը և հավերժական պայքարը ազատության համար։ Համալսարանի առաքելությունն է ազատ մտածող, ազնիվ, բարեկիրթ, ստեղծագործ և նախաձեռնող քաղաքացի կերտելը։ Միաժամանակ, մենք ամբողջ սփյուռքում ունենք մեկ հայկական համալսարան, որն աշխատում է Բեյրութում, խոսքը Հայկազյան համալսարանի մասին է, որի կարգախոսն է «Ճշմարտություն, ազատություն, և ծառայություն», կարծում ենք այս կարգախոսը շատ նման է մեր ընտրած կարգախոսին՝ «Ազատություն, ազնվություն»»

Ուսանողը նաև անդրադարձավ Համբարյանի պնդմանը, թե ՇՊՀ դեկաններից մեկը՝ Աիդա Գարեգինյանը նաև հոգաբարձուների խորհրդի անդամ է, այն դեպքում, երբ ՇՊՀ կանոնադրության մեջ գրված է, որ գիտխորհրդի անդամը, չի կարող լինել նաև հոգաբարձուների խորհրդի անդամ, իսկ այդ կինն, ի պաշտոնե, գիտխորհրդի անդամ է»։ Նա պնդեց, որ Աիդա Գարեգինյանը ՀԽ-ի անդամ լինելով՝ գիտական խորհրդի անդամ չէ: Երկրորդ սուտն այն է, թե Ա.Գարեգինյանը դեկան է, այնինչ նա դեկան չէ, այլ դեկանի ժամանակավոր պաշտոնակատար:

Նա նաև ընդգծեց, որ խորհրդանիշները բուհի 90 - ամյակին ընդառաջ անհատույց նվեր են համալսարանին՝ ՇՊՀ-ի ուսանող հանդիսավող «Ռեստարտ Գյումրի» երիտասարդական-քաղաքացիական կենտրոն ՀԿ-ի ներկայացուցիչների կողմից։ «Դրանց մշակման համար որևէ մեկը չի վճարվել համալսարանի բյուջեից: Իսկ ո՞վ է տեղյակ՝ Գագիկ Համբարյանը ինչ-որ բան արե՞լ է բուհի համար անհատույց, անվճար, հասարակական հիմունքներով։ Կամ ի՞նչ հավելյալ արժեք է ստեղծվել նրա կողմից մեր համալսարանի, մեր քաղաքի և մեր երկրի համար»։

Ղուկասյանը նաև «Փաստինֆո» էր ուղարկել նամակ, որտում հայտնել էր, որ պահանջում է պատասխանատվության կանչել Համբարյանին։

Նամակում մասնավորապես նշվում է.

«Խստորեն դատապարտելով նման վարքագիծը, կոչ եմ անում ՇՊՀ-ի հոգաբարձուների խորհրդին, ՇՊՀ Գիտական խորհրդին, ՇՊՀ ղեկավարությանը և, իհարկե, համալսարանական համայնքին դատապարտել նման վարքը, հանդես գալ այնպիսի կարգավորող նախաձեռնություններով, որոնցով վերջ կդրվի նման խայտառակ «հրապարակախոսությանը» և սա կլինի վերջին դեպքը այդ շարքից»:

Աղբյուր` Փաստինֆո