Փաստ ինֆո

Կառավարությունն այսօրվա նիստում որոշեց 15 մլն 700 հազար դրամ հատկացնել Հայաստանի պատմության թանգարանում «Մայր աստվածություն․Անահիտից Մարիամ» ժամանակավոր ցուցադրության հանրահռչակման համար:

Նիստում ԿԳՄՍ նախարար Ժաննա Անդրեասյանը հայտնեց, որ այս տարի նախատեսվում է պատմության թանգարանում Բրիտանական թանգարանի հետ համատեղ ցուցադրություն բացել, որը կարևոր նշանակություն է ունենալու թանգարանների միջազգայնացման ուղղությամբ։

«Կարևոր է, որ մեր թանգարանները զարգացնեն միջազգային թանգարանների հետ համագործակցությունը և աշխարհի հեղինակավոր թանգարանների հետ համատեղ ցուցադրություններ կազմակերպեն, ինչը նաև էապես նպաստում է մեր մշակույթի հանրահռչակմանը։ Այս իմաստով կարևոր է, որ Հայաստանի պատմության թանգարանի հիմնադրման 105-ամյակն է լրանում, ինչպես նաև թանգարանի հիմնադրի՝ անվանի ազգագրագետ Երվանդ Լալայանի 180-ամյակը»։
«Մայր աստվածություն․ Անահիտից Մարիամ» ժամանակավոր ցուցադրության շրջանակում Հայաստաում առաջին անգամ կցուցադրվի Բրիտանական թանգարանի մշտական ցուցադրության մեջ ներկայացված Սատաղղից գտնված և Անահիտ աստվածուհուն վերագրվող հայտնի բրոնզե արձանից պահպանված գլուխը ու ձեռքը:
Նախագծի հիմնավորման մեջ նշվում է, որ այս կարևոր միջոցառումը պատշաճ հանրայնացնելու կարևորությունից ելնելով՝ անհրաժեշտ է ցուցահանդեսին ընդառաջ իրականացնել նաև թվային, ֆիզիկական գովազդային արշավ՝ համապատասխան մարքեթինգային գործիքակազմով:

Ցուցահանդեսի հանրահռչակման ազդագրերը կտեղադրվեն Երևանում, իսկ թվային տեխնոլոգիաներով հանրահռչակումը՝ հանրապետության ողջ տարածքով:
Ցուցահանդեսի բացումը նախատեսված է 2024 թվականի սեպտեմբերի 21-ին՝ Հայաստանի անկախության օրվա տոնական միջոցառումների շրջանակում:

Ակնկալվում է, որ ցուցադրության վեց ամիսների ընթացքում թանգարանը կունենա նվազագույնը 300 000 այցելու, իսկ հանրահռչակման արդյունքում՝ 800 000 - 1000 000 մարդ տեղեկացված կլինի ցուցահանդեսի մասին:

Աղբյուր` Փաստինֆո