Փաստ ինֆո

Հաճախ, մեր տարածաշրջանում մեծ գերտերությունների քաղաքականության վրա ազդում են փոքր պետություններ, որոնք ակտիվ և նախաձեռնող են։ Տվյալ դեպքում Ադրբեջանն է, որ մեծ ազդեցություն է ունենում ամերիկյան, ռուսական և այլ կողմերի քաղաքականության մշակման վրա։ ԱՄՆ պետքարտուղարը ասել է, որ խոսքը միջին միջանցքի հարավային ուղղության մասին է, որը, ըստ պետքարտուղարի, պետք է Ռուսաստանի ազդեցության տակից հանի Կենտրոնական Ասիան և Հարավային Կովկասը։ «ՓաստԻնֆոյի» եթերում ասել է Արցախի Հանրապետության ՏԿԵ նախկին նախարար, հասարակական-քաղաքական գործիչ Հայկ Խանումյանը։

Ըստ բանախոսի, Հայաստանի իշխանությունները որևէ քաղաքականություն չեն որդեգրել։ Այն իրավիճակի համար, որում հայտնվել ենք, երեք ուղղություն կա՝ միանալ թուրքական տնտեսական աշխարհ ստեղծելու ծրագրերին և փորձել որոշակի հարցեր կարգավորել՝ խաղաղության, տնտեսական և այլն։ Դա, իհարկե, կոնֆլիկտների է բերելու Իրանի և Ռուսաստանի հետ։ Երկրորդ ուղղությունը «Հյուսիս-Հարավն» է, իսկ երրորդ տարբերակը՝ փորձել բալանսավորել այդ երկու ուղղությունները և կոնֆլիկտի չգնալ ո՛չ հարևանների հետ, ոչ ուժային կենտրոնների։ Պետք է այնպես անել, որպեսզի կոմունիկացիաների մի մասը մեզնով անցնի։

Բանախոսը կարծում է, որ, եթե Հայաստանը գնում է արևմտյան ուղղությամբ և վատացնում է հարաբերությունները Ռուսաստանի, Վրաստանի և Իրանի հետ, ապա դա գին ունի։ Պետք է հասկանալ, թե ով է վճարելու այդ գինը։ Եթե Հայաստանի հաշվին է՝ Հայաստանը չի ձգելու։ Եթե Ադրբեջանի նպատակը Նախիջևանի հետ Հայաստանի միջոցով կումունիկացիաներ կառուցելն է, ապա դա էլ իր գինն ունի։ Սա կենսունակ պետության վարքագիծ չէ, մարող պետության վարքագիծ է։

«Արցախի հարցը փակված չէ և, եթե տարբեր գերտերություններ այս տարածաշրջանը ապագայում համարում են մեկ միավոր, մեկ տնտեսական ինտեգրացիոն դաշտ և այլն, ապա Արցախի հարցը պետո է լուծվի, հակառակ դեպքում, կմնա ական՝ տարածշրջանի տակ։ Օրինակ, լայն ինքնավարությամբ արցախցիները կկարողանան վերադառնալ Արցախ՝ սեփական գվարդիայով, դատաիրավական մարմիններով, սեփական ինքնավար հանրապետությամբ, իշխանությամբ։ Սա միակ տրամաբանական լուծումն է, որը կարող է առաջարկվել։ Հակառակ դեպքում, միշտ էլ հայտնվելու են տարբեր դերակատարներ, որոնք դեմ են տարածաշրջանի ինտեգրացիային և օգտագործելու են Արցախի հարցը՝ ինտեգրացիա թույլ չտալու համար։

Մանրամասները՝ տեսանյութում։

Աղբյուր` Փաստինֆո