Փաստ ինֆո

Հեղուկ գազի շուկայում բորսայի գները բարձրացել են, ամբողջ աշխարհում ներկրվող ապրանքի գները բարձրացել են, դրա պատճառով մեր ներքին շուկայում էլ են գները բարձրացել: Վերջին տվյալներով՝ հեղուկ գազ ներկրող ընկերությունների քանակը 98 է դարձել, որեւէ մեկի բաժինը 10 տոկոսը չի գերազանցում:

Այս մասին այսօր լրագրողների հետ ճեպազրույցում ասաց Մրցակցության պաշտպանության հանձնաժողովի նախագահ Գեղամ Գևորգյանը:

Նա ընդգծեց, որ 9-10 սուբյեկտների բաժինը 4-5 տոկոսի սահմաններում է։ «Մնացածն ավելի փոքր են: Այսինքն, սրանով հերքվում է, որ փոքր սուբյեկտները դուրս են եկել, դրա համար են գները բարձրացել: Տնտեսվարողները տարբեր գներով են առնում հեղուկ գազը՝ կախված ծավալից, բայց միջինը 105-110 դրամ է: Դրա համար էլ, եթե ծախսերը գումարում ենք, տեսնում ենք, որ այսօրվա գները նույնն են»:

Անդրադառնալով բենզինի շուկայում ուսումնասիրությանը՝ նա նշեց, որ այն շուտով կավարտեն: «Մենք կարծում ենք, որ այնտեղ առերևույթ չարաշահում եղել է, բայց վերջնական որոշում չկա»,-ասաց նա:

Հարցին՝ Հայաստանում հիմա կա՞ն ներկրողներ որոնք մենաշնորհ ունեն՝ հանձնաժողովի նախագահը բացասական պատասխան տվեց՝ նշելով, որ միայն գազն է մենաշնորհ. «Բոլորը ինչ ուզեն, կարող են ներկրել: Նույն շաքարի շուկայում այսօր 4-5 խաղացող կա, ու ձեր պատկերացրած տնտեսվարող սուբյեկտների թիվն ու քանակն է փոխվել է»:

Աղբյուր` Փաստինֆո