Փաստ ինֆո

Ծանր փոխզիջումների մասին ԱՄՆ պետքարտուղարի խոսնակի վերջին հայտարարությունները, առնվազն ինձ համար, տարօրինակ են, քանի որ փաստացի այս 6 տարիների ընթացքում Հայաստանն է միակողմանի զիջումներ անում։ «Փաստինֆո»-ի հետ զրույցում արձանագրեց քաղաքագետ Խաչիկ Գալստյանը։

Նրա արձանագրմամբ՝ այս, պարագայում կարող են լինել լավատեսական և վատատեսական վարկածներ։ «Իհարկե, կարելի է մի քանի վարկած առաջադրել։ Առաջին վարկածը հարաբերականորեն լավատեսական կարող է դիտվել, որ հայտարարությունը կարող է մեխանիկական աշխատանքի արդյունք լինել՝ հաշվի առնելով, որ 2020 թվականից սկսած, պարբերաբար, Հայաստանին ու Ադրբեջանին ուղղված կոչեր են հնչեցնում անում, ըստ որի խաղաղությունը կամ երկարատև հրադադարի հաստատումը պետք է կողմերի համար ծանր փոխզիջումների գնով լինի։ Այսինքն՝ սա կարող է լինել նախկին տեքստերն ուղղակի մեխանիկորեն պատճենելու արդյունքում արած արտահայտություն։ Եվ կարող է լինել ավելի վատատեսական վարկած, որ, այո, ամերիկյան կողմից Հայաստանի վրա ավելի բարձր ճնշում է գործադրվում, և այդ փոխզիջումներ կոչվածը Հայաստանին պարտադրելու միակողմանի զիջումներ»,- արձանագրել է քաղաքագետը։

Ըստ նրա՝ այդ զիջումների անոնսներն արդեն, փաստացի, արված են։ Այն է՝ այսօր այդ 4 գյուղի միակողմանի հանձնումից հետո, հաջորդն Արարատի 4 անկլավների հանձնումն է, հետո՝ Սյունիքի, Գեղարքունիքի հատվածները, միջանցքի միակողմանի բացումը։ Սրանք այն զիջումներն են, որոնք, Խ.Գալստյանի գնահատմամբ, Հայաստանի համար ծանր փոխզիջումների գինն են։

Նա համոզված է, որ Ադրբեջանը ոչ մի փոխզիջման պատրաստ չէ։ «Ադրբեջանը Հայաստանի ինքնիշխան տարածքից նույնիսկ 1 սմ դուրս գալ չի պատրաստվում, հետեւապես այդ հայտարարությունները միայն վերաբերում են Հայաստանի կողմից միակողմանի հերթական զիջումների պարտադրանքին։

«Լավագույն դեպքում՝ Ադրբեջանի փոխզիջումը, կարող եմ գուշակել , դիտարկում են Հայաստանն ամբողջությամբ չօկուպացնելը, որովհետև Ալիևը հիմա հոխորտում է ամբողջ աշխարհի առաջ, իր բռունքն է թափահարում։ Տեսնում եք, թե, պարբերաբար, ինչպես է խոսում եվրոպական չինովնիկների, Ֆրանսիայի նախագահի կամ ամերիկյան տարբեր կալիբրի քաղաքական գործիչների հետ, երբ նրանք փորձում են արցախահայության իրավունքների կամ անվտանգության ինչ-որ հարցեր առաջ քաշել։ Այսօր զուտ իրենց կողմից փոխզիջում ընկալվում է այն, որ Հայաստանը լրիվ ծնկի չեն բերում և Հայաստանի ողջ տարածքն Ալիեւը չի օկուպացնում»,- ասաց Գալստյանը։

Ինչպես արդեն հայտնել ենք՝ ԱՄՆ պետքարտուղարության խոսնակ Մեթյու Միլլերը հայտարարել է, որ Միացյալ Նահանգների կարծիքով Հայաստանն ու Ադրբեջանն անհավանական առաջընթաց են գրանցել և երկար ճանապարհ են անցել բանակցություններում, այդուհանդերձ, խաղաղության համաձայնագրին հասնելը կողմերից պահանջում է որոշ բարդ ընտրություններ և դժվար փոխզիջումներ կատարել։

«Հայաստանի և Ադրբեջանի միջև խաղաղության համաձայնագիրը շատ մեծ նշանակություն կունենա այդ երկրների և տարածաշրջանի խաղաղության, կայունության և անվտանգության համար: Մենք, իսկապես, կարծում ենք, որ համաձայնությունը հնարավոր է, բայց դա երկու կողմերից պահանջում է կատարել որոշ բարդ ընտրություններ և դժվար փոխզիջումներ, և այն, ինչ մենք պատրաստվում ենք անել՝ շարունակելն է նրանց առաջ մղել՝ լուծելու այդ վերջնական տարաձայնություններն ու հասնել համաձայնության», - իր խոսքում նշել է Միլլերը՝ չցանկանալով, սակայն, հավելյալ մանրամասներ հայտնել Վաշինգտոնում տեղի ունեցած բանակցությունների վերաբերյալ:

Մեթյու Միլլերը վստահեցրել է, որ, թեև, դեռևս համաձայնություն ձեռք չի բերվել, այդուհանդերձ ԱՄՆ-ը չի պատրաստվում կանգ անել, քանի դեռ նման համաձայնագիր չկա»։

Աղբյուր` Փաստինֆո