Փաստ ինֆո

Շիրակի պետական համալսարանի տարբերանշանը փոխվել է։ 90-ամյա բուհի Գիտական խորհուրդը նախկին կապույտ և ոսկեգույն տարբերանշանի փոխարեն հաստատել է կարմիր գույն ունեցող տարբերանշանը, որի վրայից հանվել է Արագած սարը, փոխարենն ավելացրել են «ազատություն» և «ազնվություն» բառերը։

«Փաստինֆո»-ի հետ զրույցում Պատմության և իրավագիտության ամբիոնի դասախոս Գագիկ Համբարյանն ասաց, որ, ի սկզբանե, տարբերանշանի վրա եղել է Արագած լեռը, սակայն թե ինչու լեռը նոր տարբերանշանի հեղինակին դուր չի եկել և ինչու է այն հեռացվել՝ որևէ բացրատրություն չկա։

«Ամենայն հավանականությամբ, մտածել են Արարատն է պատկերված և հեռացրել են»։ Այս ամենի հեղինակը ոմն Ղուկասյան Գևորգն է, ով եղել է մեր բուհի նախկին ուսանողը, հեռակա բաժնում հոգեբանություն էր ուսանում և անցած տարի ավարտել է։ «Ռեստարտ Գյումրի» ՀԿ-ի ղեկավարն է, զբաղեցրել է համալսարանի ուսանողական խորհրդի նախագահի պաշտոնը, հիմա էլ կամավոր սկզբունքով բուհի ռեկտորի հասարակական հիմունքերով խորհրդականն է»,- ասաց Համբարյանը։

Նա ընդգծեց, որ տարբերանշանը իսկապես որոշակի փոփոխության կարիք, թերևս, ուներ, մասնավորապես՝ բացվեր ՇՊՀ հապավումը։

«Զավեշտալի է, որ, իբր, 2 տարի աշխատել են բուհի տարբերանշանի վրա։ Նախ՝ կարմիրը, կարծում եմ, ագրեսիվ գույն է, երկրորդը՝ բացի Արագած սարը հեռացնելը, ինձ համար անհասկանալի է «ազատություն» և «ազնվություն» բառերն ավելացնելը։ Ես բացել եմ ՀՀ մյուս բոլոր բուհերի տարբերանշանները, ուսումնասիրել եմ միջազգային փորձը, և որևէ մեկի վրա նման ավելորդություն չկա։ Գրում են միայն համալսարանի անվանումը և հիմնադրման տարեթիվը։ Աշխարհի համալսարանների վրա եթե գրառումներ էլ կան՝ ապա ամբողջությամբ քրիստոնեական, աստվածաշնչային գրառումներ են։ Հիմա, երբ 90-ամյա բուհի տարբերանշանի վրա գրում են «ազատություն» և «ազնվություն», սրանով ինչ են ուզում ասել, որ մեր մենք դրանով հպարտանում ենք, թե դրա հետ խնդիրներ ունենք։

Մենք, իրականում, ՇՊՀ-ում՝ իսկապես այս բառերի առումով խնդիրներ ունենք, քանի որ նախաձեռնության հեղինակը, չնայած ավելի քան մեկ տարի է ավարտել է բուհը, սակայն շարունակում է հոգաբարձուների խորհրդի անդամ լինել՝ որպես ուսանող։ Ավելին, նա միակը չէ, ով իրավունք չունի զբաղեցնել բուհի հոգաբարձուների խորհրդի անդամի պաշտոնը, օրինակ, ՇՊՀ դեկաններից մեկը՝ Աիդա Գարեգինյանը նաև հոգաբարձուների խորհրդի անդամ է, այն դեպքում, երբ ՇՊՀ կանոնադրության մեջ գրված է, որ գիտխորհրդի անդամը, չի կարող լինել նաև հոգաբարձուների խորհրդի անդամ, իսկ այդ կինն, ի պաշտոնե, գիտխորհրդի անդամ է։ ՇՊՀ հոգաբարձուների խորհրդի նախագահ Լևոն Բարսեղյանն, ով այդ պաշտոնը զբաղեցնում է արդեն 6 տարի, բացարձակ դրանք չի նկատում ու խոսում է արդարությունից»։

Նա նշեց, որ միայն մեկ անգամ են համալսարանում խոսել տարբերանշանի փոփոխության մասին։ «Մեր գործընկերներից մեկն առաջարկեց, որ գան հանդիպեն անբիոնի պրոֆեսորադասախոսական անձնակազմի հետ, բացատրեն, թե ինչու են գործընթացը նախաձեռնել ու ինչ տեսլականներ ունեն, բայց ոչ մի արձագանք չեղավ ու ոչ մի հանդիպում չկազմակերպվեց, ու այդպես էլ չհասկացանք, թե «Ռեստարտ Գյումրին» ինչ կապ ունի ՇՊՀ-ի հետ, ինչու են նրանք տարբերանշանըհորինում, այն դեպքում, երբ ՇՊՀ-ում կա կերպարվեստի բաժին, որը մասնագետներ է թողարկում»։

Աղբյուր` Փաստինֆո