Փաստ ինֆո

ԲԴԽ-ում արդեն վաղուց են որոշումները կայացվում միաձայն, ընդ որում՝ այն պահից սկսած, երբ ես սկսեցի չճանաչել այն մարդկանց, ովքեր կայացնում են այդ որոշումները։ Այս մասին «Փաստինֆո»-ի հետ զրույցում ասաց փաստաբան Երվանդ Վարոսյանն՝ անդրադառնալով ԲԴԽ-ի միաձայն ընդունած որոշմանը՝ դադարեցնել դատավոր Աննա Դանիբեկյանի լիազորությունները։

Վարոսյանը նշեց, որ իր համար զարմանալի չէ, որ իշխանությունները չեն խնայում նաեւ իրենց ծառայություններ մատուցած դատավորի համբավ ունեցողներին։ «Իսկ ինչո՞ւ պիտի խնայեր ԲԴԽ-ն կամ ավելի ճիշտ՝ Նիկոլ Փաշինյանը Աննա Դանիբեկյանին։ Երբեք ոչ մեկին չի խնայելու, անկախ նրանից, թե ինչ ծառայություններ են նրանք մատուցել կամ չեն մատուցել իրենց։

Ըստ քաղաքական նպատակահարմարության՝ նա զոհելու է բոլորին։ Չգիտեմ, սա դաս կլինի՞, օրինակ, այսօր ծառայություններ մատուցողներին, թե ոչ, խիստ կասկածում եմ, բայց այսօր ծառայություն մատուցողներն էլ վաղն են էդպես, ժողովրդական լեզվով ասած՝ «փուռը» գնալու»,- արձանագրեց փաստաբանը։

Անդրադառնալով ԲԴԽ-ի որոշման հիմնավորմանը, թե Ռոբերտ Քոչարյանի դատական պրոցեսը ձգձգվել է 4 տարի 4 ամիս՝ Վարոսյանը շեշտեց, որ հենց այս պահին դատական պրոցես ունի, որը շարունակվում է արդեն 11 տարի։
«Գիտե՞ք, երբ ժամկետների մասին են խոսում՝ «հավի ծիծաղն» էլ է գալիս։ Վարույթ են նախաձեռնում, մեղադրանք են առաջադրում հախուռն հիմնավորումներով, հետո էդ ամենը լցնում են դատարաններ, մինչդեռ, ամեն դատավորի վարույթում 200 գործ կա, մինչև դատավորներն այդ ամենից փորձում են գլուխ հանել՝ բանը բանից անցնում է։ Հետո էլ ասում են՝ ժամկետները չեք պահպանում։ Բնական է, որ չեն կարող պահպանել, բայց դրա մեղավորը պետությունն է, ոչ թե կոնկրետ որևէ դատավոր։

Իրավական տեսակետից ես այս տարբերակով հարցին մոտենալը արդարացված չեմ համարում, այստեղ իրավաբանություն գոյություն չունի։ Եթե հիշում եք, իրենք սկզբում ֆիլմ նկարեցին հետո այդ ֆիլմի հիման վրա էլ այս որոշումը կայացրեցին։ Երկու դեպքում էլ իրենք քաղաքական ենթատեքստը ուղիղ բացահայտ ասում են, հրապարակում են։ Ոչ թե Ռոբերտ Քոչարյանի պաշտպաններն են փորձում հիմնավորել, որ դա քաղաքական տարր ունի, այլև արդեն հենց իրենք են ուղիղ տեքստով ասում։ Սա խոսում է այն մասին, որ այս մարդիկ որևէ սահմանափակում չունեն, որևէ արգելանք չունեն, անգամ խոսելու արգելանք չունեն։ Սա նշանակում է,որ իրենք այլևս որևէ բանից չեն պաշտպանվում, սա է ողբերգությունը՝ այն, որ արդեն ուղիղ ասում են՝ ինչ են անում ու ինչու են անում։

Եթե ես լինեի Ռոբերտ Քոչարյանի պաշտպանը՝ այս հարցը Եվրոպական դատարանում բարձրացնելու համար այս որոշումը նման հիմնավորմամբ ինձ համար գտածո կլիներ, անպայման կբարձրացնեի հարցը»,- ասաց Երվանդ Վարոսյանը։

Դիտարկմանը, թե որոշմամբ հայտարարվում էր, որ Աննա Դանիբեկյանը վարկաբեկել է դատական իշխանությունը, սակայն ո՞վ իրապես ավելի շատ վարկաբեկեց այն՝ Աննա Դանիբեկյանը՞, թե ԲԴԽ-ն՝ փաստաբանը պատասխանեց, որ իրականում և Աննա Դանիբեկյանը, և ԲԴԽ-ն։ «Աննա Դանիբեկյանը ոչ թե իր որոշմամբ վարկաբեկեց կամ ժամկետները խախտելով, որոշումների անօրինականություններով, մնացածը՝ պրոցեսներն արագ են եղել, թե դանդաղ՝ էական չեն»։

Աղբյուր` Փաստինֆո