Փաստ ինֆո

ԵՄ-ին անդամակցության հայտ ներկայացնելու հանրաքվեի անվան ներքո այս իշխանությունը մտադիր է միաժամանակ հանրաքվեի ներկայացնել Սահմանադրության փոփոխությունները։

Այս մասին «Փաստինֆոյի» տաղավարում ասել է պատմաբան, միջազգային անվտանգության մասնագետ Արմեն Մանվելյանն՝ ընդգծելով, որ հիմնականում կարևոր 4-5 հարց են ցանկանում փոփոխել։

«Առաջինը Անկախության հռչակագրից հրաժարումն է, իսկ Անկախության հռչակագիրը ցանկացած պետության անկախության փաստաթուղթն ու ծննդականն է։ Հրաժարվել Հայաստանի Անկախության հռչակագրից՝ նույն է թե հրաժարվել Հայաստանի անկախությունից։ Եկեք անկեղծ լինենք՝ այսօր արդեն Հայաստանը դրսից կառավարվող երկիր է, ու դրանից հետո դրսից կառավարումը դառնում է օրինական։

Երկրորդը՝ ցանկանում են Սահմանադրությունից հանել Հայ առաքելական եկեղեցու հատուկ կարգավիճակը, որը ունի Հայաստանյայց առաքելական եկեղեցին, այն հավասարեցնել մյուս կրոնական կառույցներին։

Երրորդը՝ ցանկանում են վերացնել պառլամենտական մեծամասնություն հասկացությունը։ Հիմա կառավարություն ձևավորելու համար խորհրդարանական մեծամասնությունը պետք է ունենա 50+1 տոկոս։ Նոր Սահմանադրությամբ իրենք պատկերացնում են, որ վարչապետ կարող է ընտրել այն ուժը որը կունենա պարզ մեծամասնություն խորհրդարանում։

Սրանք փոփոխություններ են, որոնք Հայաստան պետությունը, որը թղթի վրա դեռ կա վերջնականապես կործանելու է և դարձնելու է սատելիտ երկիր։

Չորրորդ փոփոխությամբ ցանկանում են հնարավորություն ամրագրել տարածքային փոփոխություններ իրականացնել առանց հանրաքվեի։ Հանրաքվեի գաղափարը դուրս է բերվելու Սահմանադրությունից»,-ասաց Մանվելյանն՝ ընդգծելով, որ Ադրբեջանը ցանկանում է, ոչ միայն ստանալ անկլավները, այլև այդ անկլավների հետ հողային կապ ստանալ։

Նա ընդգծեց, որ դա անելու համար պետք է կազմակերպվի հանրաքվե, իսկ հանրաքվեի օրենքը շատ խիստ է և իրենք դա դժվարությամբ դա կարող են անել։ Նոր Սահմանադրությամբ՝ իրենց դա ցանկանում են անել խորհրդարանական պարզ մեծամասնությամբ։

Աղբյուր` Փաստինֆո