Փաստ ինֆո

Այ, պարոն Բաքոյան, այ կոռուպցիոներ հիմա կարտահայտեմ իմ կարծիքը՝ հանքի շահագործման մասին, որ այդպես էլ չկարողացա ասել լսումների ժամանակ։ Այս մասին այսօր հրավիրված ասուլիսի ժամանակ ասաց «Հանրային վերահսկողություն» ՀԿ-ի նախագահ, Վեդի համայնքի բնակիչ Մհեր Կարագյոզյանը՝ դիմելով Վեդու համայնքապետարանի գյուղատնտեսության և բնապահպանության բաժնի պետ Շամո Բաքոյանին, ով ՔՊ-ական պատգամավոր Ռուստամ Բաքոյանի ազգականն է։

Նա նշեց, որ ուզում է հանցագործության մասին հաղորդում տալ։ «Մենք տեղեկություն ունենք, որ «Օրդ» կազմակերպությունը, որը ուզում է շահագործել հանքը՝ հուշագիր է կնքել Վեդու համայնքապետարանի հետ, որ գործարանի շահույթի 10 տոկոսը պետք է գնա Վեդու բյուջե, ինչը ինքնին կոռուպցիա է։ եթե չեք ունեցել թույլտվություն հանք բացելու ու 10 տոկոսով շահագրգռել եք, ապա այստեղ կան առերևույթ կոռուպցիոն տարրեր, ինչը պետք է հետաքրքրի դատախազությունը, պետք է հետաքրքրի նաև Վեդու ոստիկանությանը։ 4-րդ հանրային լսումը պետք է չեղարկվի ու քրեական գործ նախաձեռնվի։ Ես այս առնչությամբ հաղորդում եմ ներկայացնելու»,- ասել է հասարակական գործիչը։

Վեդի խոշորացված համայնքում նոր ցեմենտի գործարանի կառուցման աղմկահարույց նախագծի շուրջ հուլիսի 10-ին հանրային լսումներն են իրականացվել, որին ՏԻՄ-ը չի ապահովել բավարար պայմաններ՝ բոլոր շահագրգիռ կողմերի պատշաճ ներգրավման համար։ Հանրային լսումները հսկել են ոստիկանները՝ համայնքի ու հարևան բնակավայրերի բնակիչներին թույլ չտալով մասնակցել դրանց։

Աղբյուր` Փաստինֆո