Փաստ ինֆո

Հայաստանի և Ադրբեջանի արտաքին գործերի նախարարների հանդիպումից հետո, եթե մենք լսենք ԱՄՆ-ի պետքարտուղարին, ապա ամեն ինչ շատ դրական է և բոլորը սպասում են, թե ինչ որ փաստաթուղթ պետք է կնքվի։ Առաջին անգամ չէ, որ հայ-ադրբեջանական հանդիպումների ժամանակ միջնորդներին թվում է, թե շատ մոտ են փաստաթղթի ստորագրմանը։ «ՓաստԻնֆոյի» եթերում ասել է կովկասագետ, տարածաշրջանի հարցերի փորձագետ, «Հայկական նախագիծ» գիտակրթական ՀԿ համահիմնադիր Կարեն Իգիթյանը։

Բանախոսի դիտարկմամբ, Ադրբեջանը չի ցանկանում Հայաստանի հետ նորմալ հարաբերություններ ունենալ։ Եթե շատ ճնշեն Ադրբեջանին, գուցե ստորագրի ինչ որ բան, որը Հայաստանին ձեռնտու չէ։ Սակայն Ադրբեջանին դա էլ է քիչ։ Ադրբեջանը դրել է ամենաբարձր նշաձողը և չի ցանկանում նորմալ հարաբերություններ հաստատել։

Անդրադառնալով Արևմուտքում տեղի ունեցող գործընթացներին, բանախոսը նշեց, որ Արևմուտքում տեղի ունեցող քաղաքական վերադասավորումները ներսի խնդիրներով են պայմանավորված, ինչ-որ չափով նաև, Ռուսաստանի հետ կապված խնդիրներով։ Մեր տարածաշրջանում քաղաքական գիծը նույնն է մնալու։ Վրաստանի կառավարությունը արևմտամետ է, սակայն չի ցանկանում մտնել մի պատերազմի մեջ Ռուսաստանի հետ, որը մեծ պրոբլեմներ կբերի։ Տարածաշրջանի բոլոր երկրները գնում են դեպի Արևմուտք, սակայն, եթե Վրաստանը և Ադրբեջանը դա անում են, պահպանելով իրենց ազգային շահերը, ապա Հայաստանի կառավարությունը անում է դրա հակառակը։

Ինչ վերաբերվում է հայ-ռուսական հարաբերություններին, ապա բանախոսը կարծում է, որ դրանք գնալով սառեցվում են, մակարդակը նվազում է։ Հայաստանի տնտեսական իրավիճակը սակայն, բարելավվում է։ Եթե Ռուսաստանում որոշեն, որ Հայաստանի հետ տնտեսական հարաբերությունները պետք է նույնը լինեն, ինչ քաղաքական հարաբերություններն են, ապա Հայաստանի տնտեսությունը շատ մեծ վնասներ կկրի։ Այս պահին Հարավային Կովկասում Ռուսաստանի դիրքերը թուլացած են, քանի որ այստեղ դաշնակից ուներ ի դեմս Հայաստանի, որը, դե ֆակտո, չկա։

Կովկասագետը նշում է, որ ռուս-ուկրաինական պատերազմը թույլ տվեց Ամերիկային թուլացնելու իր մրցակիցներին, այսինքն, հա՛մ Ռուսաստանին, հա՛մ ԵՄ-ին։ Պատժամիջոցներից ամենաշատը տուժել է ԵՄ-ը։

Անդրադառնալով Հայաստանի ներքաղաքական խնդիրներին, բանախոսը նշեց, որ Ն․ Փաշինյանը փորձելու է Սահմանադրություն փոխել։ Եթե հաշվի, որ կարող է հանրաքվե իրականացնել՝ կիրականացնի։ Փաթեթավորումը կլինի այն, որ նույն հանրաքվեով կլուծեն և՛ ԵՄ-ի հարցը, և՛ Սահմանադրության։ «Անկլավային զիջումներ են սպասվում, Տավուշում են փորձելու ստանալ այն, ինչ ցանկանում են, հետո հասնելու են Տիգրանաշենին։ Դրան հաջորդելու է Սահմանադրության հարցը և ադրբեջանցիների, այսպես կոչված, վերադարձի հարցը, մինչև հասնեն Հայաստանի ոչնչացմանը»,- ասել է Կ․ Իգիթյանը ։

Մանրամասները՝ տեսանյութում։

Աղբյուր` Փաստինֆո