Փաստ ինֆո

Վեդի խոշորացված համայնքի Գինեվետ բնակավայրում հուլիսի 10-ին տեղի են ունեցել Վեդիում ցեմենտի գործարանի կառուցման աղմկահարույց նախագծի շուրջ հանրային լսումները, որոնց համար ՏԻՄ-ը չի ապահովել բավարար պայմաններ՝ բոլոր շահագրգիռ կողմերի պատշաճ ներգրավման համար։ Հանրային լսումները հսկել են ոստիկանները՝ համայնքի ու հարևան բնակավայրերի բնակիչներին թույլ չտալով մասնակցել դրանց։ Պատճառաբանությունը եղել է այն, որ դահլիճում տեղ չկա։ Ասել է թե՝ անունն է միայն եղել հանրային լսում, սակայն այն չի ապահովել հանրության մասնակցությունը։

Այգեզարդ գյուղի նախաձեռնող խմբի համակարգող Արփինե Խաչատրյանն այսօր հրավիրված ասուլիսում ասաց, որ Այգեզարդ և Գինեվետ համայնքները վարչական առումով կիսում են Կարմիր սարը, որի վրա նախատեսվում է հանք կառուցել։

«Մենք Այգեզարդում ավելի քան 2500 ստորագրություն էինք հավաքել՝ մեր համայնքում հանք չբացելու համար, մինչդեռ հիմա, եթե ցանկանում են հանք բացել Գինեվետում, ապա ստացվում է, որ մեր ամբողջ աշխատանքը հանքի բացման դեմ ջուրն է ընկնում»։

Նա տեղեկացրեց, որ լսումները սկսվելուց 30 րոպե առաջ ներկայացրել է դահլիճ որտեղ կայանալու էր լսումները։ «Դահլիճը դատարկ էր, երբ դուրս եկա հարցազրույց տալու՝ ընդամենը 5 րոպե անց ոստիկանական պատը փակեց փոքրիկ դուռը, այն պատճառաբանությամբ, որ ներսում տեղ չկա։ Այսինքն, դեռ լսումը չսկսած՝ 25 րոպե առաջ դահլիճը լցվեց։ Սա բացահայտ խտրականություն, ասում էին, թե սա Վեդու հարցն է, այնինչ մենք նամակ էինք ստացել, որ Այգեզարդն ու Գինեվետը պաշտոնական մակարդակով կարող է ներկայանալ ու տեսակետ արտահայտել։ Իրենք դեմքով ուսումնասիրել էին բոլորին , ովքեր դեմ են նախագծին ու հանքի բացմանը՝ թույլ չէին տալիս ներս մտնել, իսկ ովքեր ընդհանրապես հետաքրքրված չէին՝ նրանց թույլ էին տալիս ներս մտնել»։

Գինեվետ բնակավայրի բնակիչ Վարդուհի Բարսեղյանը պատմեց, որ բնակիչները միայն հունիսի 10-ին են տեղեկացել լսումների մասին. «Մարդիկ հարցնում էին, թե ինչու են այսքան ոստիկաններ հավաքվել, ինչ է լինելու, իսկ գյուղապետարանի աշխատակիցները ասում էին՝ չգիտենք։ ժամը 13.40 ներկայացանք լսումներին։ Մեզ դիմավորեց ոստիկանական պատը, մեզ ասացին՝ փակ լսում է, ասացին՝ փակ է, որովհետև ներսում տեղ չկա, շոգ է։ Ոստիկանների հետ պայմանավորվեցի, որ ներս չեմ գնա, միջանցքից կլսեմ ինչ է կատարվում, ու կարողացա 3 րոպեով ներս մտնել։ Երբ ներսում բնակիչներից մեկն ասաց, թե ինչու Գինեվետից ոչ մեկ չի արտահայտվում՝ ես ր քույրս ասացինք, որ ուզում ենք խոսել։ Հենց այդ պահին ոստիկանները մեր ձեռքերը ոլորեցին ու դուրս հանեցին»,-ասաց նա։

«Հանրային վերահսկողություն» ՀԿ-ի նախագահ, Վեդի համայնքի բնակիչ Մհեր Կարագյոզյանը նշեց դահլիճը 50 տեղանոց էր, որտեղ առնվազն 30 ոստիկան կար։ «Սա հերթական օրինակն է, երբ ոստիկանության ուղիղ միջամտությամբ չի իրացվում մարդու իրավունքը։ Սա հանրային լսում չէր, ուղղակի ֆիկցիա էր։ Դահլիճ թողնում էին միայն այն քաղաքացիներին, ովքեր կողմ էին հանքի բացմանը։ Մարդկանց անգամ թույլ չէին տալիս խոսելու, ասում էին՝ գրանցված չես»։

Աղբյուր` Փաստինֆո