Փաստ ինֆո

Արցախի Գլխավոր շտաբի և երկրի առաջնորդների նկատմամբ Ադրբեջանում հարուցվել են քրեական գործեր, որոնք դեռ դատարան պետք է մտնի։ Դատարանում ադրբեջանցիները լուրջ քննություն պետք է հանձնեն, որովհետև արդեն մոռացել են, թե ինչ է նշանակում արդար դատաքննության էլեմենտները։ Այս մասին Մեդիա Կենտրոնում «Բաքվում պահվող գերիների ճակատագիրն ադրբեջանական դատարաններում» թեմայով քննարկման ժամանակ ասաց միջազգային իրավունքի փորձագետ Արա Ղազարյանը։

«Պետք է տեսնենք, որ փաստաբանները կողքը նստած են, ոչ թե՝ ապակու հետևը, պետք է տեսնենք, որ կարողանում են հաղորդակցվել արտաքին աշխարհի հետ։ Սրանք արդեն նախադեպային դրույթներ են, որոնք ՄԻԵԴ-ը սահմանել է, բայց վստահ եմ, որ դա չի լինի, որովհետև եթե լինի, ապա դատավարությունը վերահսկողությունից դուրս կգնա։ Ադրբեջանն ինչ-որ տեղ ռիսկի է գնում՝ նման քայլերի գնալով, բայց ուզի-չուզի՝ պետք է դատավարություն իրականացնի»,- նշեց Ղազարյանը՝ հավելելով, որ հերթական ձախողումն է լինելու՝ ապահովելու այդ մարդկանց արդար դատավարությունը։

Հարցին՝ այս փուլում արդյո՞ք որևէ միջամտության հնարավորություն կա, Ղազարյանը պատասխանեց՝ նշելով, որ դա Ադրբեջանի սուվերեն տարածքն է՝ սուվերեն իրավունքով՝ մարդկանց դատելու, միջամտությունը քաղաքական է, որոշ չափով՝ իրավական, սակայն որքանով տեղյակ է՝ նրանց հարազատները չեն դիմել որևէ դատական ատյան, քանի որ դիմելու դեպքում՝ առնվազն կալանքի դեպքում՝ վաղուց կոմմունիկացված կլիներ, որովհետև Ադրբեջանի քրդատն ինքնին չի համախատասխանում նախադեպին։

«Զարմանալի է, բայց միևնույն ժամանակ կարելի է հասկանալ, որ հարազատները չեն դիմել և Ռուբեն Վարդանյանի դեպքում՝ խոշտանգման լուրերից հետո, կարծում եմ, ինչ-որ պայմանավորվածություն եղել է՝ միջազգային իրավական գործընթացներ չսկսել, բայց դատավարությունից հետո արդեն կարելի է սկսել, երբ հասկանան, որ այլևս կորցնելու ոչինչ չունեն։

Արա Ղազարյանը ուշադրություն հրավիրեց տերմինները ճիշտ օգտագործելու կարևորությանը, նշեց՝ տերմինը՝ «Արցախի ռազմաքաղաքական ղեկավարություն» սխալ է, դա առաջ է տանում ադրբեջանական այն նարատիվը, թե ռազմատենչ քաղաքականություն են վարել, ուստի՝ պետք է նշել ԳՇ և երկրի առաջնորդների նկատմամբ հետապնդումներ։

Աղբյուր` Փաստինֆո